ലണ്ടൻ: സൗദി അറേബ്യയും ഇറാനും തമ്മിലുള്ള നയതന്ത്രബന്ധം പുനരാരംഭിക്കുന്നതിനുള്ള കരാറിനെ യൂറോപ്യൻ യൂണിയൻ സ്വാഗതം ചെയ്തു.
സൗദി അറേബ്യയും ഇറാനും തമ്മിലുള്ള നയതന്ത്ര ബന്ധം പുനരാരംഭിക്കുന്നതിനുള്ള കരാറിനെ യൂറോപ്യൻ യൂണിയൻ സ്വാഗതം ചെയ്യുന്നതായും അത് നടപ്പിലാക്കുന്നതിനായി കാത്തിരിക്കുന്നുവെന്നും EU വിദേശകാര്യ ലീഡ് വക്താവ് പീറ്റർ സ്റ്റാനോ പറഞ്ഞു. ഈ സുപ്രധാന ഘട്ടത്തിലേക്ക് നയിക്കുന്ന നയതന്ത്ര ശ്രമങ്ങളെ യൂറോപ്യൻ യൂണിയൻ അംഗീകരിക്കുന്നതായും അദ്ദേഹം പ്രസ്താവനയിൽ കൂട്ടിച്ചേർത്തു.
ഇരു രാജ്യങ്ങളും തമ്മിലുള്ള സംഘർഷത്തെ തുടർന്ന് നിർത്തിയിരുന്ന നയതന്ത്ര ബന്ധം രണ്ട് മാസത്തിനുള്ളിൽ പുനഃസ്ഥാപിക്കാനും എംബസികൾ വീണ്ടും തുറക്കാനും സൗദി അറേബ്യയും ഇറാനും വെള്ളിയാഴ്ച തീരുമാനിച്ചിരുന്നു.
സമാധാനവും സുസ്ഥിരതയും പ്രോത്സാഹിപ്പിക്കുക, വിശാലമായ മിഡിൽ ഈസ്റ്റിലെ സംഘർഷങ്ങൾ കുറയ്ക്കുക എന്നിവ യൂറോപ്യൻ യൂണിയന്റെ പ്രധാന മുൻഗണനകളാണെന്നും അദ്ദേഹം പറഞ്ഞു.
അതേസമയം ഫ്രാൻസും ഈ കരാറിനെ സ്വാഗതം ചെയ്തു, സംഘർഷങ്ങൾ കുറയ്ക്കുന്നതിനും പ്രാദേശിക സുരക്ഷയും സ്ഥിരതയും ശക്തിപ്പെടുത്തുന്നതിനും മൂർത്തമായ രീതിയിൽ സംഭാവന ചെയ്യാൻ കഴിയുന്ന സംഭാഷണങ്ങളെയും ഏതൊരു സംരംഭത്തെയും തങ്ങളുടെ രാജ്യം പിന്തുണയ്ക്കുന്നുവെന്ന് ഫ്രഞ്ച് വിദേശകാര്യ മന്ത്രി കാതറിൻ കൊളോണ പറഞ്ഞു.