റിയാദ്: സൗദിയിൽ പ്രവാസി മലയാളി വെൽഡിങ് ജോലി ചെയ്യുന്നതിനിടയിൽ കെട്ടിടത്തിന് മുകളിൽ നിന്നും താഴെ വീണ് മരിച്ചു. കണ്ണൂർ മൊട്ടമ്മൽ പരേതരായ ഗോപാലൻ, കാർത്യായനി ദമ്പതികളുടെ മകൻ സതീശൻ ആണ് മരിച്ചത്. 57 വയസായിരുന്നു. അൽഖർജ് സഹനയിലെ നിർമാണത്തിലിരിക്കുന്ന കെട്ടിടത്തിന്റെ രണ്ടാം നിലയിൽ വെൽഡിങ് ജോലികൾ ചെയ്യുന്നതിനിടെ കാൽ തെന്നി താഴെ വീഴുകയായിരുന്നു. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. വീഴ്ചയുടെ ആഘാതത്തിൽ സതീശന്റെ തലയ്ക്ക് ഗുരുതരമായി പരുക്കേറ്റതാണ് മരണകാരണമെന്ന് സഹപ്രവർത്തകർ അറിയിച്ചു.
സതീശൻ കഴിഞ്ഞ 30 വർഷമായി അൽഖർജിലെ സഹനയിൽ വെൽഡിങ് വർക്ക്ഷോപ്പിൽ ജോലി ചെയ്തു വരികയായിരുന്നു. കേളി കലാസാംസ്‌കാരിക വേദി അൽഖർജ് ഏരിയ സഹന യൂണിറ്റ് പ്രസിഡന്റ് കൂടിയായിരുന്നു അദ്ദേഹം. ഭാര്യ: രജനി, മക്കൾ: സ്‌നേഹ, ഗോപിക. സഹോദരങ്ങൾ: സുജാത പി കെ, ശശി പി കെ, മരുമകൻ: യദു. സതീശന്റെ മൃതദേഹം നാട്ടിലെത്തിക്കാനുള്ള നടപടികൾ പുരോഗമിക്കുകയാണ്.
