അൽ ജൗഫ്: സൗദിയിൽ ആരോഗ്യ മാനദണ്ഡങ്ങൾ പാലിക്കാത്ത സ്ഥാപനങ്ങൾക്കെതിരെ നടപടി. അൽ ജൗഫ് മുനിസിപ്പാലിറ്റി ഷഅ്ബാൻ മാസത്തിൽ നടത്തിയ വ്യാപക പരിശോധനയെത്തുടർന്ന് ആരോഗ്യ മാനദണ്ഡങ്ങൾ പാലിക്കാത്ത 50 സ്ഥാപനങ്ങളാണ് അധികൃതർ അടച്ചുപൂട്ടിയത്. ഭക്ഷ്യശാലകൾ, ഷോപ്പിങ് സെന്ററുകൾ, കഫേകൾ, പൊതുവിപണികൾ തുടങ്ങിയ സ്ഥലങ്ങളിലാണ് അധികൃതർ പരിശോധന നടത്തിയത്.
4,173 പരിശോധനകളിൽ നിന്നായി 719 നിയമലംഘനങ്ങൾ കണ്ടെത്തിയിട്ടുണ്ട്. ആവർത്തിച്ചുള്ള വീഴ്ചകളും ഗുരുതരമായ ആരോഗ്യ പ്രശ്നങ്ങളും ചൂണ്ടിക്കാട്ടിയാണ് 50 സ്ഥാപനങ്ങൾക്കെതിരെ കർശന നടപടി സ്വീകരിച്ചതെന്ന് അധികൃതർ അറിയിച്ചു. ഉപഭോക്താക്കളുടെ സുരക്ഷ ഉറപ്പാക്കാനും സേവനങ്ങളുടെ ഗുണനിലവാരം വർധിപ്പിക്കാനുമാണ് ഇത്തരത്തിലുള്ള പരിശോധനകൾ ഊർജിതമാക്കുന്നത്. നിയമലംഘകർക്കെതിരെ വിട്ടുവീഴ്ചയില്ലാത്ത നടപടികൾ തുടരുമെന്ന് അധികൃതർ മുന്നറിയിപ്പ് നൽകുന്നു.
