റിയാദ്: മലയാളം ഉൾപ്പെടെ 16 ഭാഷകളിൽ ഗൈഡ് പുറത്തിറക്കി ഹജ്, ഉംറ മന്ത്രാലയം. ലോകത്തിന്റെ വിവിധ ഭാഗങ്ങളിൽ നിന്നുള്ള തീർഥാടകർക്ക് ഉംറ കർമങ്ങളെക്കുറിച്ചും സൗദി സന്ദർശനത്തിന്റെ സമഗ്ര വിവരങ്ങളെ കുറിച്ചും വിശദമാക്കിയാണ് 16 ഭാഷകളിൽ സൗദി ഹജ്, ഉംറ മന്ത്രാലയം ഗൈഡ് പുറത്തിറക്കിയത്. തീർഥാടകർക്കിടയിൽ ബോധവൽക്കരണം വർധിപ്പിക്കുകയും ഭാഷാപരമായ തടസ്സങ്ങൾ നീക്കി കർമങ്ങൾ എളുപ്പമാക്കുകയും ചെയ്യുക എന്ന ലക്ഷ്യത്തോടെയാണ് നടപടി.
ഉംറയുടെ കർമങ്ങൾ, വിസ നടപടിക്രമങ്ങൾ, മക്കയിലെയും മദീനയിലെയും ചരിത്ര പ്രധാന സ്ഥലങ്ങൾ, ആരോഗ്യ നിർദേശങ്ങൾ, സാമ്പത്തിക ഇടപാടുകൾ, സൈബർ സുരക്ഷ തുടങ്ങിയ കാര്യങ്ങളെ കുറിച്ചെല്ലാം വിശദമായ വിവരങ്ങൾ ഈ ഗൈഡിലുണ്ട്. പുസ്തകമായും ഓഡിയോ, വിഡിയോ, പിഡിഎഫ് രൂപങ്ങളിലും ഗൈഡ് ലഭിക്കും. www.guide.haj.gov.sa വെബ്സൈറ്റിൽ ഡിജിറ്റൽ കോപ്പി ലഭിക്കുന്നതാണ്.
