റിയാദ്: റിയാദിലെ അൽബർദിൽ മിസൈൽ പതിച്ച് രണ്ടു പേർ മരിച്ചു. ബംഗ്ലാദേശ് സ്വദേശികളാണ് മരിച്ചത്. 12 പേർക്ക് പരിക്കേൽക്കുകയും ചെയ്തിട്ടുണ്ടെന്ന് സൗദി സിവിൽ ഡിഫൻസ് അറിയിച്ചു. ഒരു ശുചീകരണ കമ്പനിയുടെ തൊഴിലാളി ക്യാമ്പ് കോമ്പൗണ്ടിലാണ് മിസൈൽ പതിച്ചത്.
ഇന്ത്യ, ബംഗ്ലാദേശ് സ്വദേശികൾ മരിച്ചെന്നാണ് നേരത്തെ സൗദി സിവിൽ ഡിഫൻസ് വ്യക്തമാക്കിയിരുന്നത്. എന്നാൽ, ഇന്ത്യക്കാരന് പരിക്ക് മാത്രമാണെന്നാണ് ഒടുവിലുള്ള ഔദ്യോഗിക സ്ഥിരീകരണം. ഇന്ത്യൻ എംബസിയും ഇക്കാര്യം ഔദ്യോഗികമായി സ്ഥിരീകരിച്ചിട്ടുണ്ട്. പ്രതിരോധിച്ച മിസൈൽ ഭാഗം വീണാണ് മരണം സംഭവിച്ചിരിക്കുന്നത്.
