റിയാദ്: ജിദ്ദയിൽ നിന്ന് നിശ്ചിത സർവീസുമായി ആകാശ എയർ. ഇന്ത്യയിലെ അഹമ്മദാബാദ്, ബെംഗളൂരു, മുംബൈ, കൊച്ചി, കോഴിക്കോട് എന്നിവിടങ്ങളിലേക്കും അവിടെ നിന്ന് തിരിച്ചുമാണ് സർവീസ് നടത്തുകയെന്ന് ഔദ്യോഗിക പ്രസ്താവനയിലൂടെ ആകാശ എയർലൈൻ അറിയിച്ചു. അതേസമയം, മിഡിൽ ഈസ്റ്റിലെ സംഘർഷ സാഹചര്യങ്ങളെ തുടർന്ന് ഇന്ത്യയിൽ നിന്ന് റിയാദിലേക്കും തിരിച്ചുമുള്ള സർവീസുകൾ നിർത്തിവെച്ചത് മാർച്ച് 17 വരെ തുടരുമെന്ന് ആകാശ എയർ അറിയിച്ചു.
അബുദാബി, ദോഹ, കുവൈത്ത് സർവീസുകളും മാർച്ച് 19 വരെ നിർത്തിവെച്ചിരിക്കുകയാണ്. ഈ നഗരങ്ങളിലേക്ക് ബുക്ക് ചെയ്ത യാത്രക്കാർ വിമാനത്താവളത്തിലേക്കുള്ള യാത്ര ആരംഭിക്കുന്നതിന് മുമ്പ് http://bit.ly/qpfltsts എന്ന വിലാസത്തിൽ അവരുടെ ഫ്ളൈറ്റ് സ്റ്റാറ്റസ് പരിശോധിക്കണം. കൂടുതൽ സഹായത്തിന്, +91 9606112131 എന്ന നമ്പറിൽ 24ഃ7 ആകാശ കെയർ സെന്ററുമായി ബന്ധപ്പെടാം.
ജിദ്ദ സർവീസടക്കമുള്ള നടപടി യാത്രക്കാർക്ക് അവരുടെ യാത്ര മുൻകൂട്ടി ആസൂത്രണം ചെയ്യാൻ സൗകര്യം വഴിയൊരുക്കുമെന്നാണ് പ്രതീക്ഷ. വിശദാംശങ്ങൾക്കും ബുക്കിങ്ങിനും http://akasaair.com സന്ദർശിക്കാം. ആകാശ എയർ ആൻഡ്രോയിഡ്, iOS ആപ്പും ഉപയോഗിക്കാം.
