റിയാദ്: മഴക്കാലത്ത് വാഹനം ഓടിക്കുമ്പോൾ പാലിക്കേണ്ട സുരക്ഷാ മാനദണ്ഡങ്ങളെക്കുറിച്ച് മാർഗനിർദേശങ്ങൾ പുറപ്പെടുവിച്ച് റിയാദിലെ കിങ് സൗദ് മെഡിക്കൽ സിറ്റി. സൗദിയിലെ വിവിധ ഭാഗങ്ങളിൽ കനത്ത മഴ തുടരുന്ന സാഹചര്യത്തിലാണ് നടപടി. വാഹനം സ്റ്റാർട്ട് ചെയ്യുന്നതിന് മുമ്പുള്ള കൃത്യമായ പരിശോധനകൾ അപകടങ്ങൾ കുറയ്ക്കാൻ സഹായിക്കുമെന്ന് അധികൃതർ അറിയിച്ചു. യാത്ര തുടങ്ങുന്നതിന് മുമ്പ് ടയറുകൾ, ബ്രേക്ക്, ലൈറ്റുകൾ എന്നിവ കൃത്യമാണെന്ന് ഉറപ്പുവരുത്തേണ്ടതാണ്. വെള്ളക്കെട്ടുകൾ കുറഞ്ഞതും സുരക്ഷിതവുമായ റോഡുകൾ യാത്രയ്ക്കായി തിരഞ്ഞെടുക്കാനും ശ്രദ്ധിക്കണം.
ഗ്ലാസുകളിൽ മഞ്ഞ് മൂടുന്നത് ഒഴിവാക്കാൻ ജനലുകൾ അല്പം താഴ്ത്തിയിടണം. നനഞ്ഞ റോഡുകളിൽ വാഹനത്തിന്റെ നിയന്ത്രണം നഷ്ടപ്പെടാതിരിക്കാൻ വേഗത പരിമിതപ്പെടുത്തണം. മുന്നിൽ പോകുന്ന വാഹനങ്ങളുമായി കൃത്യമായ സുരക്ഷിത അകലം പാലിക്കാനും ശ്രദ്ധിക്കേണ്ടതാണ്.
മഴ പെയ്യുന്ന സമയങ്ങളിൽ വാഹനമോടിക്കുമ്പോൾ കാഴ്ച വ്യക്തമാക്കാൻ വൈപ്പറുകൾ ശരിയായ രീതിയിൽ ഉപയോഗിക്കണം. കാഴ്ച മങ്ങുന്ന സാഹചര്യങ്ങളിൽ ഹെഡ് ലൈറ്റുകളും സിഗ്നൽ ലൈറ്റുകളും പ്രവർത്തിപ്പിക്കണം. റോഡിലെ തെന്നൽ സാധ്യതയും വെള്ളക്കെട്ടുകളും മുൻകൂട്ടി കണ്ട് അതീവ ജാഗ്രതയോടെ വാഹനം നിയന്ത്രിക്കണമെന്നും അധികൃതർ കൂട്ടിച്ചേർത്തു.
