റിയാദ്: മിഡിൽ ഈസ്റ്റിലെ സംഘർഷത്തിന്റെ പശ്ചാത്തലത്തിൽ പ്രതിരോധ പ്രവർത്തനങ്ങൾ ശക്തമാക്കി സൗദി അറേബ്യ. രാജ്യത്തെ ലക്ഷ്യമിട്ടെത്തിയ നിരവധി ഡ്രോണുകൾ നശിപ്പിച്ചതായി സൗദി പ്രതിരോധ മന്ത്രാലയം അറിയിച്ചു. കഴിഞ്ഞ ഏതാനും മണിക്കൂറിനുള്ളിൽ രാജ്യത്തെ ലക്ഷ്യം വെച്ചെത്തിയ 10 ഡ്രോണുകൾ പ്രതിരോധിച്ചതായി മന്ത്രാലയം വ്യക്തമാക്കി.
അതേസമയം, റിയാദിനും കിഴക്കൻ പ്രവിശ്യയ്ക്കും മുകളിലൂടെ ആറ് ബാലിസ്റ്റിക് മിസൈലുകളും 26 ഡ്രോണുകളും കഴിഞ്ഞ ദിവസം സൗദി വ്യോമ പ്രതിരോധ സേന തകർത്തതായി പ്രതിരോധ മന്ത്രാലയ വക്താവ് മേജർ ജനറൽ തുർക്കി അൽ-മാൽക്കി നേരത്തെ അറിയിച്ചിരുന്നു.
രണ്ട് മേഖലകളിലുമായി 13 ഡ്രോണുകൾ വീതം തടഞ്ഞുനിർത്തി നശിപ്പിച്ചതായി അൽ-മാൽക്കി പറഞ്ഞു. റിയാദിലെ ഒരു സൈനിക കേന്ദ്രത്തിന് സമീപം വിമാനങ്ങളുടെ അവശിഷ്ടങ്ങൾ വീണെങ്കിലും ആർക്കും പരിക്കില്ല.
