റിയാദ്: റിയാദിലെ യാത്രാ സൗകര്യങ്ങൾ ആധുനികവത്ക്കരിക്കുന്നതിന്റെ ഭാഗമായി ഹയാത്ത് മാളിനെയും മാളിനെയും റിയാദ് ഗാലറിയെയും ബന്ധിപ്പിച്ച് സെൽഫ് ഡ്രൈവ് വാഹനങ്ങൾക്കായി പുതിയ റൂട്ട് ആരംഭിച്ചു. റിയാദ് പൊതുഗതാഗത അതോറിറ്റിയാണ് ഇതുസംബന്ധിച്ച പ്രഖ്യാപനം നടത്തിയത്. സൗദിയിൽ സ്മാർട്ട് ഗതാഗത സംവിധാനങ്ങൾ വ്യാപിപ്പിക്കുന്നതിനും നൂതന സാങ്കേതിക വിദ്യകൾ ഗതാഗത മേഖലയിൽ നടപ്പിലാക്കുന്നതിനുമുള്ള പദ്ധതികളുടെ ഭാഗമായാണ് പുതിയ നടപടി.
ഈ വാഹനങ്ങൾ ദിവസവും സർവ്വീസ് നടത്തുക നേരിട്ടുള്ള സാങ്കേതിക മേൽനോട്ടത്തിലും നിയന്ത്രണത്തിലുമായിരിക്കും. യാത്രക്കാർക്ക് സുരക്ഷിതവും അത്യാധുനികവുമായ യാത്രാനുഭവം നൽകുക എന്ന ലക്ഷ്യത്തോടെയാണ് പുതിയ നീക്കം. റോഡും ചുറ്രുപാടുകളും കൃത്യമായി നിരീക്ഷിക്കാനും ഗതാഗത മാറ്റങ്ങളോട് പെട്ടെന്ന് പ്രതികരിക്കാനും ശേഷിയുള്ള അത്യാധുനിക സെൻസറുകൾ, ക്യാമറകൾ, ഇന്റലിജന്റ് സിസ്റ്റങ്ങൾ എന്നിവയെല്ലാം ഈ വാഹനങ്ങളിൽ സജ്ജമാക്കിയിട്ടുണ്ട്.
ഡ്രൈവിംഗ് കാര്യക്ഷമത വർദ്ധിപ്പിക്കുന്നതിനും മനുഷ്യസഹജമായ പിശകുകൾ ഒഴിവാക്കി സുരക്ഷ ഉറപ്പാക്കാനും സഹായിക്കുന്ന നിയന്ത്രണ സാങ്കേതികവിദ്യകളാണ് ഇതിന്റെ മറ്റൊരു പ്രത്യേകത. ദേശീയ ഗതാഗത ലോജിസ്റ്റിക്സ് പദ്ധതിയുടെയും വിഷൻ 2030 ന്റെയും ലക്ഷ്യങ്ങൾ മുൻനിർത്തിയാണ് ഈ സേവനം സൗദി വികസിപ്പിച്ചത്.
