റിയാദ്: സൗദിയിൽ ഇനി മഴ മുന്നറിയിപ്പുകൾ നേരത്തെ അറിയാം. കാലാവസ്ഥാ നിരീക്ഷണം കൂടുതൽ കാര്യക്ഷമമാക്കുന്നതിനും പൊതുജനങ്ങൾക്ക് നേരത്തെ തന്നെ കാലാവസ്ഥയുമായി ബന്ധപ്പെട്ട മുന്നറിയിപ്പുകൾ നൽകുന്നതിന്റെ ഭാഗമായി സൗദി ദേശീയ കാലാവസ്ഥാ കേന്ദ്രം ക്ലൈമറ്റ് മാപ്പുകൾ അവതരിപ്പിച്ചു.
മാപ്പ് തയാറാക്കുന്നത് കൃത്രിമ ഉപഗ്രഹങ്ങളിൽ നിന്നുള്ള വിവരങ്ങളുടെ അടിസ്ഥാനത്തിലാണ്. ഇതിന്റെ ആദ്യ ഘട്ടത്തിൽ ഏപ്രിൽ മാസത്തെ ക്ലൈമറ്റ് മാപ്പ് പുറത്തിറക്കിയിട്ടുണ്ട്. തെക്കുപടിഞ്ഞാറൻ, പടിഞ്ഞാറൻ ഉയർന്ന പ്രദേശങ്ങളിലാണ് ഏപ്രിലിൽ ഏറ്റവും കൂടുതൽ മഴ ലഭിക്കുകയെന്നാണ് മാപ്പിൽ സൂചിപ്പിക്കുന്നത്.
സൗദിയുടെ മധ്യമേഖലയിൽ മഴ കുറവായിരിക്കും. രാജ്യത്തിന്റെ ബാക്കി ഭാഗങ്ങളിൽ വ്യത്യസ്ത അളവുകളിലായിരിക്കും മഴ ലഭിക്കുക. മാപ്പ് നൽകുന്ന വിവരങ്ങളുടെ അടിസ്ഥാനത്തിൽ കാലാവസ്ഥാ വ്യതിയാനങ്ങളെ സംബന്ധിച്ച് നേരത്തെ അറിയാനും ആവശ്യമായ സുരക്ഷാ മുൻകരുതലുകൾ സ്വീകരിക്കാനും ബന്ധപ്പെട്ട അതോറിറ്റികൾക്ക് കഴിയുമെന്നാണ് പ്രതീക്ഷിക്കുന്നത്.
