റിയാദ്: സൗദിയുടെ ചെങ്കടൽ തീരത്തെ തന്ത്ര പ്രധാനമായ കവാടമായി ജിസാൻ സിറ്റി ഫോർ ബേസിക് ആൻഡ് ഡൗൺ സ്ട്രീം ഇൻഡസ്ട്രീസ്പോർട്ട്. അത്യാധുനിക അടിസ്ഥാന സൗകര്യങ്ങളും സംയോജിത ലോജിസ്റ്റിക് സേവനങ്ങളും വഴി ഓരോ വർഷവും10 ലക്ഷത്തിലധികം കണ്ടെയിനറുകൾ കൈകാര്യം ചെയ്യാനുള്ള ശേഷി ഈ തുറമുഖം കൈവരിച്ചിട്ടുണ്ട്.
മേഖലയിലെ വ്യവസായ വാണിജ്യ മേഖലകൾക്ക് വലിയ പിന്തുണ നൽകുന്ന തുറമുഖമാണിത്. രാജ്യത്തെ പ്രധാന ലോജിസ്റ്റിക്സ് റൂട്ടുകളിൽ ഒന്നായാണ് തുറമുഖത്തെ പരിഗണിക്കുന്നത്. പ്രതിവർഷം 50 ലക്ഷം ബൾക്ക് ടണ്ണിൽ അധികം കാർഗോ കൈകാര്യം ചെയ്യാനുള്ള ശേഷിയും ഈ തുറമുഖത്തിനുണ്ട്.
കണ്ടെയ്നർ ക്വേ, കാർഗോ ക്വേ, ജനറൽ കാർഗോ ക്വേ എന്നിവ ഉൾപ്പെടുന്ന 1250 മീറ്റർ നീളമുള്ള ക്വേ തുറമുഖത്തിലുണ്ട്. ഇവിടെ കസ്റ്റംസ് ക്ലിയറൻസ് നടപടികളും വേഗത്തിലാണ് നടക്കുന്നത്.
ചരക്കുകൾ കൈകാര്യം ചെയ്യുന്നതിനും ഏകീകരിക്കുന്നതിനുള്ള മികച്ച സംവിധാനങ്ങളാണ് ഇവിടുത്തെ മറ്റൊരു പ്രത്യേകത.
