ജിദ്ദ: മക്ക മേഖലയിൽ ലൈസൻസില്ലാതെ പ്രവർത്തിക്കുന്ന ഫുഡ് ട്രക്കുകൾ പിടിച്ചെടുക്കാൻ കാപിറ്റൽ മുനിസിപ്പാലിറ്റി. നഗരത്തിലെ വാണിജ്യ പ്രവർത്തനങ്ങൾ ക്രമീകരിക്കുന്നതിനും ശുചിത്വവും സൗന്ദര്യവും ഉറപ്പുവരുത്തുന്നതിനും വേണ്ടിയാണ് നടപടി. റോഡരികുകളിലും, നടപ്പാതകളിലും, പൊതു സൗകര്യങ്ങളിലും ഉപേക്ഷിക്കപ്പെട്ടതോ പാർക്ക് ചെയ്തതോ ആയ ട്രക്കുകൾ 72 മണിക്കൂറിനകം നീക്കം ചെയ്യണമെന്ന് അധികൃതർ ഉടമകളോട് ആവശ്യപ്പെട്ടു.
നിശ്ചിത സമയപരിധിക്കുള്ളിൽ നിർദേശം പാലിച്ചില്ലെങ്കിൽ വാഹനം പിടിച്ചെടുക്കുമെന്നും പിഴ ചുമത്തുന്നത് അടക്കമുള്ള നടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി. ഫുഡ് ട്രക്ക് രംഗത്ത് കൃത്യമായ അച്ചടക്കം കൊണ്ടുവരികയും നിയമപരമായി ലൈസൻസ് എടുത്ത് പ്രവർത്തിക്കുന്ന സംരംഭകർക്ക് സുരക്ഷിതമായ ബിസിനസ് സാഹചര്യം ഒരുക്കുകയുമാണ് ലക്ഷ്യമെന്നും അധികൃതർ കൂട്ടിച്ചേർത്തു.
