റിയാദ്: ബലിപെരുന്നാൾ ആഘോഷങ്ങളുടെ ഭാഗമായി വിതരണം ചെയ്യപ്പെടുന്ന ബലിമാംസം കഴിക്കുന്നതിൽ മിതത്വം പാലിക്കണമെന്ന് നിർദ്ദേശിച്ച് സൗദിയിലെ ജനറൽ അതോറിറ്റി ഫോർ ഫുഡ് ആൻഡ് ഡ്രഗ് അതോറിറ്റി. പൊതുജനാരോഗ്യം സംരക്ഷിക്കുന്നതിന്റെ ഭാഗമായാണ് അതോറിറ്റി ഇത്തരമൊരു ഓർമപ്പെടുത്തൽ നടത്തിയത്.
ബലിപെരുന്നാൾ ആഘോഷങ്ങളുടെ ഭാഗമായി വരും ദിവസങ്ങളിൽ ബലിമാംസം സുലഭമാകും. അതിനാൽ മാംസം കഴിക്കുന്നതിൽ മിതത്വം പാലിക്കണമെന്നാണ് നിർദേശം. ആരോഗ്യകരവും സമീകൃതവുമായ പോഷകാഹാര ശീലം നിലനിർത്തണം. ശരീരത്തിന് ആവശ്യമായ ദൈനംദിന പ്രോട്ടീന്റെ അളവ് മനസ്സിലാക്കി വേണം മാംസം കഴിക്കാനെന്ന് അതോറിറ്റി ചൂണ്ടിക്കാട്ടി.
ഒരാൾക്ക് ഒരു ദിവസം ആവശ്യമായ ആകെ കലോറി ശരാശരി 2000 കലോറി കണക്കാക്കിയാൽ 15% മുതൽ 20% വരെ മാത്രമായിരിക്കണം പ്രോട്ടീനിൽ നിന്ന് ലഭിക്കേണ്ടത്. അതായത് പ്രതിദിനം 300 മുതൽ 400 വരെ കലോറി പ്രോട്ടീൻ മാത്രമേ ശരീരത്തിൽ എത്താൻ പാടുള്ളൂ. മാംസവിഭാഗത്തിൽ ഉൾപ്പെടുന്ന ഭക്ഷണങ്ങൾ ഒരു ദിവസം 2 മുതൽ 3 പോർഷൻ വരെ മാത്രമേ കഴിക്കാവൂവെന്നും അധികൃതർ കൂട്ടിച്ചേർത്തു.
