റിയാദ്: സൗദിയിൽ പ്രവർത്തിക്കുന്ന എല്ലാ ധനകാര്യ കമ്പനികളും ഏതെങ്കിലും നിക്ഷേപ റൗണ്ട് നടത്തുന്നതിന് കുറഞ്ഞത് അഞ്ച് പ്രവൃത്തി ദിവസങ്ങൾക്ക് മുമ്പെങ്കിലും സെൻട്രൽ ബാങ്കിനെ അറിയിക്കണം. ഇക്കാര്യം നിർബന്ധമാക്കിയതായി സൗദി സെൻട്രൽ ബാങ്ക് അറിയിച്ചു. ധനകാര്യ കമ്പനികൾ, പേയ്മെന്റ് സേവന ദാതാക്കൾ, എക്സ്ചേഞ്ച് ബ്യൂറോകൾ, സെൻട്രൽ ബാങ്ക് ലൈസൻസുള്ള ധനകാര്യ പ്രവർത്തനങ്ങളെ പിന്തുണയ്ക്കുന്ന സ്ഥാപനങ്ങൾ എന്നിവ ഈ സ്ഥാപനങ്ങളിൽ ഉൾപ്പെടുന്നു.
നിക്ഷേപ റൗണ്ടുകൾ നടത്താൻ ഉദ്ദേശിക്കുന്ന സ്ഥാപനങ്ങൾ നിക്ഷേപ റൗണ്ടിന്റെ സമയപരിധി, ഉദ്ദേശ്യം, മൂല്യം, ലക്ഷ്യ പ്രേക്ഷകർ എന്നിവയുൾപ്പെടെ എല്ലാ പ്രസക്തമായ വിവരങ്ങളും ബാങ്ക് ഇതര ധനകാര്യ സ്ഥാപനത്തിന്റെ ഉടമസ്ഥാവകാശ ഘടനയിലും സാമ്പത്തിക സ്ഥിതിയിലും അതിന്റെ സ്വാധീനം വിശദീകരിക്കുന്ന ഒരു പ്രസ്താവനയും വെളിപ്പെടുത്തണമെന്ന് സൗദി സെൻട്രൽ ബാങ്ക് നിർദ്ദേശിച്ചു.
സ്ഥാപനങ്ങൾ ഇൻവെസ്റ്റ്മെന്റ് ഇൻസ്ട്രുമെന്റ്സുകളുടെ തരത്തെയും ഘടനയെയും കുറിച്ചുള്ള വിശദാംശങ്ങൾ, അതായത് ഇക്വിറ്റി, കൺവേർട്ടിബിൾ ഇൻസ്ട്രുമെന്റ് അല്ലെങ്കിൽ ഡെബ്റ്റ് ഇൻസ്ട്രുമെന്റ്, മറ്റ് പ്രസക്തമായ സഹായ രേഖകൾ, സെൻട്രൽ ബാങ്ക് പ്രത്യേകം അഭ്യർത്ഥിച്ച ഏതെങ്കിലും രേഖകൾ എന്നിവ നൽകണം.
