റിയാദ്: സൗദിയിൽ 6,574 ബിഎംഡബ്ല്യു കാറുകൾ വിപണിയിൽ നിന്നും തിരിച്ചുവിളിച്ചു. വാഹനത്തിലെ വയറിങ് തകരാറിനെ തുടർന്നാണ് വാണിജ്യ മന്ത്രാലയത്തിന്റെ നടപടി. ബിഎംഡബ്ല്യു 7 സിരീസ്, 5 സിരീസ് മോഡലുകളിലെ 2023 മുതൽ 2025 വരെയുള്ള വർഷങ്ങളിലിറങ്ങിയ വാഹനങ്ങളാണ് തിരിച്ചുവിളിച്ചിരിക്കുന്നത്.
കോക്പിറ്റിലെ വയറിങ് ഹാർനസിലുള്ള തകരാർ കാരണം കേബിളുകൾ നശിക്കുന്നതിനും ഷോർട്ട് സർക്യൂട്ടിനും സെൻസറുകൾ അമിതമായി ചൂടാകുന്നതിനും കാരണമായേക്കാം. ഇത് മൂലം വാഹനത്തിൽ നിന്ന് പുക ഉയരാനോ തീപിടിത്തമുണ്ടാകാനോ സാധ്യതയുണ്ടെന്ന് മന്ത്രാലയം ചൂണ്ടിക്കാട്ടി.
Recalls.sa വഴി വാഹന തിരിച്ചറിയൽ നമ്പർ (VIN) പരിശോധിച്ച് വാഹനങ്ങൾ തിരിച്ചുവിളിക്കലിൽ ഉൾപ്പെട്ടിട്ടുണ്ടോ എന്ന് പരിശോധിക്കാൻ മന്ത്രാലയം ഉടമകൾക്ക് നിർദ്ദേശം നൽകി.
ആവശ്യമായ അറ്റകുറ്റപ്പണികൾ സൗജന്യമായി ലഭിക്കുന്നതിന് മുഹമ്മദ് യൂസഫ് നാഗി കമ്പനിയുമായി ബന്ധപ്പെടാനും ഉപഭോക്താക്കളോട് അഭ്യർത്ഥിച്ചു.
