റിയാദ്: സൗദിയിലെ വിവിധ ഭാഗങ്ങളിൽ ഇടിമിന്നലോടുകൂടിയ മഴക്കും വെള്ളപ്പൊക്കത്തിനും സാധ്യതയുണ്ടെന്ന് മുന്നറിയിപ്പ്. ജിസാൻ, അസീർ, അൽ-ബഹ, മക്ക എന്നീ മേഖലകളുടെ വിവിധ ഭാഗങ്ങളിൽ മഴയ്ക്കും വെള്ളപ്പൊക്കത്തിനും സാധ്യതയുണ്ടെന്നാണ് സൗദി കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകുന്നത്.
മദീന മേഖലയുടെ ചില ഭാഗങ്ങളിലും മിതമായതോ ഇടത്തരമോ ആയ മഴയുണ്ടായിരിക്കും. റിയാദ്, ഹാഇൽ, തബൂക്ക്, അൽ-ജൗഫ്, വടക്കൻ അതിർത്തികൾ എന്നീ മേഖലകളുടെ ചില ഭാഗങ്ങളിലും പൊടിക്കാറ്റ് വീശിയടിക്കാൻ സാധ്യതയുണ്ട്. മക്ക, കിഴക്കൻ പ്രവിശ്യ എന്നിവയുടെ തീരപ്രദേശങ്ങളിൽ രാത്രിയിലും പുലർച്ചെയും മൂടൽമഞ്ഞ് രൂപപ്പെടാൻ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം കൂട്ടിച്ചേർത്തു.
