റിയാദ്: സൗദിയിലെ കിങ് അബ്ദുൽ അസീസ് റോയൽ റിസർവിൽ അനധികൃത വേട്ട നടത്തിയ മൂന്ന് പേർ പിടിയിൽ. സ്വദേശി പൗരന്മാരാണ് പിടിയിലായത്. പരിസ്ഥിതി സുരക്ഷാ സേനയാണ് ഇവരെ അറസ്റ്റ് ചെയ്തത്. അവശ്യമായ ലൈസൻസില്ലാതെയാണ് ഇവർ മൃഗങ്ങളെയും പക്ഷികളെയും വേട്ടയാടിയിരുന്നത്. ഒരു ഷോട്ട്ഗൺ, ഒരു എയർ റൈഫിൾ, 358 തോക്കുണ്ടകൾ, വേട്ടയാടിപ്പിടിച്ച 117 കാട്ടുജീവികൾ തുടങ്ങിയവ ഇവരിൽ നിന്നും പിടിച്ചെടുത്തു.
വന്യജീവികളെ വേട്ടയാടുന്നത് തടയുന്ന പാരിസ്ഥിതിക നിയമങ്ങൾ കർശനമായി പാലിക്കണമെന്ന് അധികൃതർ നിർദ്ദേശിച്ചു. ലൈസൻസില്ലാതെ ഷോട്ട്ഗൺ ഉപയോഗിച്ച് വേട്ടയാടിയാൽ ഒരു ലക്ഷം റിയാൽ വരെ പിഴ ചുമത്തുക. ലൈസൻസില്ലാതെ വേട്ടയാടുന്നതിന് 10,000 റിയാൽ പിഴയും, നിരോധിത മേഖലകളിൽ പ്രവേശിക്കുന്നതിന് 5,000 റിയാൽ പിഴയും ലഭിക്കും.
ലൈസൻസില്ലാതെ കാടപ്പക്ഷികളെ വേട്ടയാടിയാൽ 1,500 റിയാൽ പിഴ ചുമത്തുമെന്നും പ്രാവുകളെ വേട്ടയാടിയാൽ 1,000 റിയാലാണ് പിഴയായി ലഭിക്കുകയെന്നും അധികൃതർ അറിയിച്ചു. പാരിസ്ഥിതിക നിയമലംഘനങ്ങളോ വന്യജീവികൾക്കെതിരായ കുറ്റകൃത്യങ്ങളോ ശ്രദ്ധയിൽപ്പെട്ടാൽ വിവരങ്ങൾ മക്ക, മദീന, റിയാദ്, ഈസ്റ്റേൺ പ്രൊവിൻസ് എന്നിവിടങ്ങളിലുള്ളവർ 911 എന്ന നമ്പറിലും, മറ്റ് പ്രദേശങ്ങളിൽ 999 അല്ലെങ്കിൽ 996 എന്നീ നമ്പറുകളിലും വിവരം അറിയിക്കേണ്ടതാണ്.
