റിയാദ്: സൗദി അറേബ്യയിലേക്ക് പഴം-പച്ചക്കറി ഇറക്കുമതി ചെയ്യുന്നതിന് പുതിയ നിയന്ത്രണം. പഴങ്ങളുടെയും പച്ചക്കറികളുടെയും ഇറക്കുമതി പെർമിറ്റിന്റെ സാധുത കാലയളവ് ഇഷ്യൂ ചെയ്ത തീയതി മുതൽ 15 ദിവസമായി നിശ്ചയിച്ചിട്ടുണ്ട്. വാണിജ്യ മന്ത്രി ഡോ. മാജിദ് അൽ-ഖസബി അംഗീകരിച്ച പുതിയ ഇറക്കുമതി ലൈസൻസിംഗ് ഗൈഡിന്റെ ഭാഗമായിരുന്നു ഇത്. 30 ദിവസത്തിന് ശേഷം പുതിയ നിയന്ത്രണങ്ങൾ പ്രാബല്യത്തിൽ വരും. ചരക്കുകൾ സൗദിയിൽ എത്തുന്നതിന് 24 മണിക്കൂർ മുൻപെങ്കിലും പെർമിറ്റ് വാങ്ങണം.
അംഗീകാരം ലഭിക്കുന്നതുവരെ ഷിപ്പ്‌മെന്റുകൾ അയയ്ക്കാൻ പാടില്ല. ഇറക്കുമതി പെർമിറ്റ് ഇല്ലാതെ എത്തുന്ന ഏതൊരു ഷിപ്പ്മെന്റും നിരസിക്കപ്പെടും. ഇറക്കുമതി അപേക്ഷകൾ ”നാമ” പ്ലാറ്റ്ഫോം വഴിയാണ് സമർപ്പിക്കേണ്ടത്. ഓരോ അപേക്ഷയ്ക്കും പരമാവധി ഏഴ് പ്രവൃത്തി ദിവസങ്ങൾ പ്രോസസ്സിംഗ് കാലയളവ് ഗൈഡ് നിശ്ചയിച്ചിട്ടുണ്ട്. നിരസിക്കപ്പെട്ട അപേക്ഷകർക്ക് നിരസിക്കപ്പെട്ട വിവരം അറിയിച്ചതിന് 15 ദിവസത്തിനുള്ളിൽ പരിസ്ഥിതി, ജല, കൃഷി മന്ത്രാലയത്തിൽ അപ്പീൽ നൽകാൻ അവകാശമുണ്ട്.
