റിയാദ്: പ്രീമിയം അംഗങ്ങൾക്കായി പുതിയ പ്രഖ്യാപനവുമായി റിയാദ് എയർ. പ്രീമിയം അംഗങ്ങൾക്ക് റിയാദ് എയർ ഗോൾഡൻ ടിക്കറ്റ് പ്രഖ്യാപിച്ചിരിക്കുകയാണ്. ഗോൾഡൻ ടിക്കറ്റ് നേടുന്നവർക്ക് ഒരു വർഷം മുഴുവൻ സൗജന്യമായി റിയാദ് എയറിൽ യാത്ര ചെയ്യാനുള്ള അവസരമാണ് ലഭിക്കുക.
റിയാദ് എയർ ഗോൾഡൻ ടിക്കറ്റ് നൽകുന്നത് സൗദിയിലെയും പ്രധാന അന്താരാഷ്ട്ര വിപണികളിലെയും ‘സഫീർ’ ലോയൽറ്റി പ്രോഗ്രാമിൽ അംഗങ്ങളായവർക്കാണ്. പങ്കെടുക്കുന്ന ഓരോ വിപണിയിൽ നിന്നും ഒരു സഫീർ അംഗത്തിനാണ് ഈ അവസരം ലഭിക്കുക. ആകെ 12 യാത്രാ ടിക്കറ്റുകളാണ് വിജയിക്ക് ലഭിക്കുക. ഇതിൽ ആറ് ബിസിനസ് ക്ലാസ് ടിക്കറ്റുകളും ആറ് പ്രീമിയം ഇക്കോണമി ടിക്കറ്റുകളുമുണ്ടാകും.
ഒരു വർഷം മുഴുവൻ ഓരോ മാസവും ഒരു യാത്ര സൗജന്യമായി നടത്താം. ജോലി ആവശ്യങ്ങൾക്കായോ വിനോദയാത്രയ്ക്കായോ ടിക്കറ്റുകൾ ഉപയോഗിക്കാം. അതേസമയം, ഗോൾഡൻ ടിക്കറ്റ് സ്വന്തമാക്കാൻ സഫീർ ലോയൽറ്റി പ്രോഗ്രാമിലെ അംഗത്വം നിർബന്ധമാണ്. സഫീർ പ്രോഗ്രാമിലെ എല്ലാ അംഗങ്ങളെയും 2026 ഒക്ടോബറിൽ നടക്കുന്ന ഗോൾഡൻ ടിക്കറ്റ് നറുക്കെടുപ്പിൽ സ്വമേധയാ ഉൾപ്പെടുത്തും. വിജയികൾക്ക് ലഭിക്കുന്ന ടിക്കറ്റുകൾ 2027 ഒക്ടോബർ വരെ ഉപയോഗിക്കാനാകും. മത്സരത്തിന്റെ നിബന്ധനകളും വ്യവസ്ഥകളും റിയാദ് എയറിന്റെ ഔദ്യോഗിക വെബ്‌സൈറ്റിൽ കാണാൻ കഴിയും.
