റിയാദ്: സൗദി അറേബ്യയിലെ ഇന്ത്യൻ പൗരന്മാർക്ക് ജാഗ്രതാ നിർദ്ദേശം നൽകി റിയാദിലെ ഇന്ത്യൻ എംബസി. നിലവിലെ സാഹചര്യങ്ങളുടെ പശ്ചാത്തലത്തിലാണ് ജാഗ്രതാ നിർദ്ദേശം. പ്രവാസികൾ വീടുകൾക്കുള്ളിൽ തന്നെ തുടരണമെന്നും പ്രാദേശിക ഭരണകൂടം ഔദ്യോഗിക ചാനലുകൾ വഴി നൽകുന്ന സുരക്ഷാ മാർഗനിർദേശങ്ങൾ കർശനമായി പാലിക്കണമെന്നും എംബസി വ്യക്തമാക്കി. വാർത്താക്കുറിപ്പിലൂടെയാണ് എംബസി ഇതുസംബന്ധിച്ച നിർദ്ദേശം നൽകിയത്.
അതേസമയം, റിയാദിലെ ഇന്ത്യൻ എംബസിയും ജിദ്ദയിലെ കോൺസുലേറ്റും വി.എഫ്.എസ് വഴിയുള്ള സേവനങ്ങളും സാധാരണ നിലയിൽ തന്നെ പ്രവർത്തിക്കുന്നുണ്ടെന്ന് അധികൃതർ അറിയിച്ചു. ആവശ്യമെങ്കിൽ വരുംദിവസങ്ങളിലും പുതിയ നിർദേശങ്ങളും അറിയിപ്പുകളും പുറപ്പെടുവിക്കും.
സഹായങ്ങൾക്കായി പ്രവാസി ഭാരതീയ സഹായതാ കേന്ദ്രത്തിന്റെ 24 മണിക്കൂറും പ്രവർത്തിക്കുന്ന സൗജന്യ ടോൾ ഫ്രീ ഹെൽപ്പ്‌ലൈൻ നമ്പറായ 8002471234 ലഭ്യമാണെന്നും പുതിയ വിവരങ്ങൾക്കായി എംബസിയുടെ ഔദ്യോഗിക സോഷ്യൽ മീഡിയ അക്കൗണ്ടുകൾ മാത്രം പിന്തുടരണമെന്നും അധികൃതർ വ്യക്തമാക്കി.
നിലവിലെ സംഭവവികാസങ്ങളുമായി ബന്ധപ്പെട്ട വീഡിയോകളോ വാർത്തകളോ സമൂഹമാധ്യമങ്ങൾ വഴി പ്രചരിപ്പിക്കുകയോ റീപോസ്റ്റ് ചെയ്യുകയോ ചെയ്യരുതെന്നും അധികൃതർ കൂട്ടിച്ചേർത്തു.
