ബാങ്ക് അക്കൗണ്ടിൽ മിനിമം ബാലൻസ് ഇല്ലാത്തതിന്റെ പേരിൽ ഇനി പെൻഷൻ തുകയിൽ നിന്ന് ബാങ്കുകൾ അനാവശ്യമായി പിഴ ഈടാക്കില്ല.
കിട്ടുന്ന ചെറിയ പെൻഷൻ തുകയിൽ നിന്ന് ബാങ്കുകൾ എസ്.എം.എസ് ചാർജും മറ്റ് സർവീസ് ചാർജുകളും പിഴയുമൊക്കെയായി പണം വെട്ടിക്കുറയ്ക്കുന്നത് സാധാരണക്കാരെ വലിയ ബുദ്ധിമുട്ടിലാക്കിയിരുന്നു. അക്കൗണ്ടിൽ മിനിമം ബാലൻസ് സൂക്ഷിക്കാൻ സാധിക്കാത്തതാണ് ഇതിന് പ്രധാന കാരണമായത്. ഈ പ്രശ്നത്തിന് പരിഹാരം കാണണമെന്ന് ആവശ്യപ്പെട്ട് ഓവർസീസ് ഇന്ത്യൻ കൾച്ചറൽ കോൺഗ്രസ്, ഈസ്റ്റേൺ പ്രൊവിൻസ്, തിരുവനന്തപുരം ജില്ലാ കമ്മിറ്റി ജനറൽ സെക്രട്ടറി ശ്രീ. ശ്രീനാഥൻ സർക്കാരിന് നൽകിയ പരാതിയിലാണ് ഇപ്പോൾ വ്യക്തത വന്നിരിക്കുന്നത്.
ബാങ്കുകളിൽ മിനിമം ബാലൻസ് തുകയില്ലാതെ തന്നെ ഉപയോഗിക്കാൻ കഴിയുന്ന സീറോ ബാലൻസ് അക്കൗണ്ട് സൗകര്യം റിസർവ് ബാങ്കിന്റെ നിർദ്ദേശപ്രകാരം എല്ലാ ബാങ്കുകളിലും ലഭ്യമാണെന്ന് സർക്കാർ സ്ഥിരീകരിച്ചു. പെൻഷൻ വാങ്ങുന്നവർക്ക് തങ്ങളുടെ നിലവിലുള്ള സാധാരണ അക്കൗണ്ട് ഇത്തരം സീറോ ബാലൻസ് അക്കൗണ്ടിലേക്ക് മാറ്റാനോ, അല്ലെങ്കിൽ പുതിയ സീറോ ബാലൻസ് അക്കൗണ്ട് തുടങ്ങാനോ പൂർണ്ണ അവകാശമുണ്ട്.
എന്നാൽ ബാങ്കുകൾ സ്വമേധയാ നിങ്ങളുടെ അക്കൗണ്ട് സീറോ ബാലൻസ് അക്കൗണ്ടാക്കി മാറ്റിത്തരില്ല എന്നത് പ്രത്യേകം ശ്രദ്ധിക്കണം. പെൻഷൻകാർ തന്നെ നേരിട്ട് ബാങ്കിൽ ചെന്ന് ആവശ്യപ്പെട്ടാൽ മാത്രമേ ബാങ്കുകൾ ഈ മാറ്റം ചെയ്തു നൽകൂ. അതിനാൽ, ബാങ്ക് പിഴ കാരണം ബുദ്ധിമുട്ടുന്ന എല്ലാ പെൻഷൻകാരും എത്രയും വേഗം തങ്ങളുടെ ബാങ്ക് ശാഖയുമായി ബന്ധപ്പെട്ട് അക്കൗണ്ട് ‘BSBDA’ ആയി മാറ്റാൻ അപേക്ഷ നൽകേണ്ടതാണ്.
