റിയാദ്: ഹൂതി ആക്രമണങ്ങളെ അപലപിച്ച ഐക്യരാഷ്ട്രസഭ സുരക്ഷാ സമിതിയുടെ തീരുമാനത്തെ സ്വാഗതം ചെയ്ത് സൗദി അറേബ്യ. രാജ്യത്തിനെതിരെ വർദ്ധിച്ചുവരുന്ന ഹൂത്തി ആക്രമണങ്ങളെ ശക്തമായി അപലപിച്ച ഐക്യരാഷ്ട്രസഭ സുരക്ഷാ കൗൺസിലിന്റെ പ്രസിഡൻഷ്യൽ പ്രസ്താവനയെ സൗദി അറേബ്യ സ്വാഗതം ചെയ്തു. അന്താരാഷ്ട്ര നിയമപ്രകാരം സുരക്ഷ സംരക്ഷിക്കാനും പൗരന്മാരെയും താമസക്കാരെയും സംരക്ഷിക്കാനുമുള്ള അവകാശം സൗദി ഉറപ്പിച്ചു. സൗദി അറേബ്യയുമായുള്ള സുരക്ഷാ കൗൺസിലിന്റെ ഐക്യദാർഢ്യത്തിനും, സിവിലിയന്മാർ, വിമാനത്താവളങ്ങൾ, സുപ്രധാന അടിസ്ഥാന സൗകര്യങ്ങൾ എന്നിവ ലക്ഷ്യമിട്ടുള്ള തുടർച്ചയായ ഹൂതി ആക്രമണങ്ങളെയും ചെങ്കടലിലും ബാബ് അൽ – മന്ദാബ് കടലിടുക്കിലും സമുദ്ര ഗതാഗതത്തിനുള്ള ഭീഷണികളെയും അപലപിച്ചതിനും സൗദി വിദേശകാര്യ മന്ത്രാലയം നന്ദി അറിയിച്ചു
സ്വന്തം പ്രദേശത്തെ സിവിലിയന്മാരെയും സിവിലിയൻ വസ്തുക്കളെയും ലക്ഷ്യം വച്ചുള്ള ആക്രമണങ്ങളെ നേരിടുന്നതിൽ സുരക്ഷാ കൗൺസിൽ അംഗങ്ങളുടെ ഐക്യദാർഢ്യത്തെ രാജ്യം വിലമതിക്കുന്നു. അന്താരാഷ്ട്ര നിയമപ്രകാരം തങ്ങളുടെ സുരക്ഷയും പൗരന്മാരെയും താമസക്കാരെയും സംരക്ഷിക്കുന്നതിന് ആവശ്യമായ എല്ലാ നടപടികളും സ്വീകരിക്കാനുള്ള അവകാശത്തിന് രാജ്യം ഊന്നൽ നൽകുന്നുവെന്ന് മന്ത്രാലയം ചൂണ്ടിക്കാട്ടി.
