റിയാദ്: സൗദിയിൽ ഇന്ത്യൻ സ്‌കൂൾ വിദ്യാർത്ഥി വാഹനാപകടത്തിൽപ്പെട്ട് മരിച്ചു. ദമ്മാം ഇന്ത്യൻ സ്‌കൂൾ ആറാം ക്ലാസ് വിദ്യാർഥി സാറ തൻവീർ അഹമ്മദാണ് മരിച്ചത്. സ്‌കൂളിലേക്കുള്ള യാത്രക്കിടെ വാഹനം അപകടത്തിൽപ്പെട്ടത്. ബീഹാർ ദുർഗാപൂർ സ്വദേശി അഹമ്മദ് തൻവീറിന്റെ മകളാണ്. അൽകോബാർ കോർണീഷ് റോഡിൽ വെച്ചാണ് അപകടം സംഭവിച്ചത്.
അപകടത്തിൽ അഞ്ച് പേർക്ക് പരിക്കേൽക്കുകയും ചെയ്തു. ഇവർ നിലവിൽ ചികിത്സയിലാണ്. ഇവർ സഞ്ചരിച്ചിരുന്ന വാഹനം ഡിവെഡറിൽ തട്ടി മറിഞ്ഞാണ് അപകടം ഉണ്ടായത്. കെ.എം.സി.സി വെൽഫയർ വിഭാഗം ഭാരവാഹികളായ ഇഖ്ബാൽ ആനമങ്ങാടിന്റെയും ഹുസൈൻ നിലമ്പൂരിന്റെയും നേതൃത്വത്തിൽ നിയമ നടപടികൾ പുരോഗമിക്കുകയാണ്. നാളെ ഉച്ചക്ക് ദുഹർ നമസ്‌കാരനന്തരം അൽകോബാർ അൽഫുർഖാൻ മസ്ജിദിൽ ജനാസ നമസ്‌കാരം നടക്കും. തുടർന്ന് തുഖ്ബ ഖബർ സ്ഥാനിൽ മൃതദേഹം മറവ് ചെയ്യും.
