റിയാദ്: റിയാദിന്റെ വടക്കൻ മേഖലയിലെ അബഹ റോഡിൽ സമഗ്രമായ വികസന പ്രവർത്തനങ്ങൾ പൂർത്തിയാക്കി. റിയാദ് മുൻസിപ്പാലിറ്റിയാണ് ഇക്കാര്യം അറിയിച്ചത്. രണ്ട് കിലോമീറ്റർ നീളത്തിൽ നടന്ന ഈ പദ്ധതിയിലൂടെ റോഡിന്റെ അടിസ്ഥാന സൗകര്യങ്ങൾ മെച്ചപ്പെടുത്തുകയും നഗരഭംഗി വർദ്ധിപ്പിക്കുകയും ചെയ്തു.
പഴയ അസ്ഫാൽട്ട് പാളികൾ നീക്കം ചെയ്ത് 2,200 ക്യൂബിക് മീറ്റർ പുതിയ ടാറിട്ടു. 2,000 ചതുരശ്ര മീറ്ററിൽ റോഡ് മാർക്കിങ്ങുകളും 300 ചതുരശ്ര മീറ്ററിൽ കാൽനടയാത്രക്കാർക്കുള്ള അടയാളങ്ങളും പാർക്കിങ് സൗകര്യങ്ങളും ഒരുക്കി. യാത്രക്കാരുടെ സുരക്ഷയ്ക്കായി 42 തൂണുകളിലായുള്ള 84 ലൈറ്റുകൾ പരിശോധിച്ച് പ്രവർത്തനക്ഷമമാക്കി. റോഡിന്റെ മധ്യഭാഗത്തായി 160 പുതിയ മരങ്ങൾ വെച്ചുപിടിപ്പിക്കുകയും ഉണങ്ങിപ്പോയ ഈന്തപ്പനകൾ നീക്കം ചെയ്യുകയും നിലവിലുള്ളവ വെട്ടി ഒതുക്കുകയും ചെയ്തുവെന്ന് റിയാദ് മുൻസിപ്പാലിറ്റി അറിയിച്ചു.
