റിയാദ്: അടിയന്തര സാഹചര്യങ്ങളിൽ നാഷണൽ ഏർലി വാണിങ് പ്ലാറ്റ്ഫോം വഴി മുന്നറിയിപ്പ് സന്ദേശങ്ങൾ സ്വീകരിക്കുന്നത് സംബന്ധിച്ച നിർദേശങ്ങളും മാർഗനിർദേശങ്ങളും പാലിക്കണമെന്ന് ആവശ്യപ്പെട്ട് സൗദി ജനറൽ ഡയറക്ടറേറ്റ് ഓഫ് സിവിൽ ഡിഫൻസ്. പരിഭ്രാന്തിയില്ലാതെ, സമചിത്തതയോടെ ശാന്തത പാലിക്കുക, ഔദ്യോഗിക നിർദേശങ്ങൾ പാലിക്കുക, അപകടസാഹചര്യങ്ങൾ കഴിഞ്ഞുപോകുന്നതുവരെ കെട്ടിടത്തിനുള്ളിലെ ഏറ്റവും അടുത്തുള്ള സുരക്ഷിത സ്ഥലത്തേക്കോ ജനാലകളിൽ നിന്ന് അകലെയുള്ള ഒരു ഉൾഭാഗത്തെ മുറിയിലേക്കോ ഉടൻ പോകുക, അപകടം കടന്നുപോകുന്നതുവരെ വീടോ കെട്ടിടമോ വിട്ടുപോകരുത് തുടങ്ങിയവയാണ് പ്രധാനപ്പെട്ട മാർഗനിർദ്ദേശങ്ങൾ.
തുറന്ന സ്ഥലങ്ങളിൽ നിന്നും, ഗ്ലാസുകളിൽ നിന്നും അകലം പാലിക്കുക, ബാൽക്കണിയിലോ മേൽക്കൂരകളിലോ നിൽക്കരുത്, ഒത്തുചേരലുകളും ചിത്രമെടുക്കലും പൂർണ്ണമായും ഒഴിവാക്കുക, അപകടകരമായ സ്ഥലങ്ങളിൽ നിന്ന് അകലം പാലിക്കുക എന്നിവയും ഇതിൽ ഉൾപ്പെടുന്നു. വാഹനത്തിലായിരിക്കുമ്പോൾ മുന്നറിയിപ്പ് സന്ദേശം ലഭിച്ചാൽ, പാലങ്ങളിൽ നിന്നും ഉയരമുള്ള കെട്ടിടങ്ങളിൽ നിന്നും മാറി റോഡരികിൽ നിർത്തണം തുടങ്ങിയവയും നിർദ്ദേശങ്ങളിൽ ഉൾപ്പെടുന്നു.
