റിയാദ്: 18,708 ടൊയോട്ട-ലെക്സസ് വാഹനങ്ങൾ സൗദി വിപണിയിൽ നിന്നും തിരിച്ചുവിളിച്ചു. 2025-2026 മോഡലിലുള്ള 18,708 ടൊയോട്ട ലാൻഡ് ക്രൂയിസർ, ലെക്സസ് LX600 വാഹനങ്ങൾ തിരിച്ചുവിളിക്കുമെന്ന് വാണിജ്യ മന്ത്രാലയം പ്രഖ്യാപിച്ചു. ഓട്ടോമാറ്റിക് ട്രാൻസ്മിഷൻ ഷിഫ്റ്റ് വാൽവുകളിലെ തകരാർ കാരണമാണ് തിരിച്ചുവിളിക്കൽ.
ഈ തകരാർ എഞ്ചിൻ അമിതമായി പ്രവർത്തിക്കാൻ കാരണമാകും. ഇത് അപകടത്തിനോ തീപിടുത്തത്തിനോ സാധ്യത വർദ്ധിപ്പിക്കും. ടൊയോട്ട വാഹനങ്ങൾക്ക് 8004400055 എന്ന ടോൾ ഫ്രീ നമ്പറിൽ ബന്ധപ്പെടണമെന്നും ലെക്സസ് വാഹനങ്ങൾക്ക് 8001220022 എന്ന ടോൾ ഫ്രീ നമ്പറിൽ ബന്ധപ്പെടണമെന്നും വാഹന ഉടമകളോട് മന്ത്രാലയം ആവശ്യപ്പെട്ടു.
ആവശ്യമായ അറ്റകുറ്റപ്പണികൾ സൗജന്യമായി നടത്തുന്നതിന് വാഹന ഉടമകൾ അവരുടെ പ്രാദേശിക ഡീലറായ അബ്ദുൾ ലത്തീഫ് ജമീൽ കമ്പനിയെ ബന്ധപ്പെടണമെന്ന് മന്ത്രാലയം ആവശ്യപ്പെട്ടു. ഡിഫെക്റ്റീവ് പ്രോഡക്റ്റ്സ് റീകോൾ സെന്റർ വെബ്സൈറ്റ് (http://Recalls.sa) സന്ദർശിച്ച്, വാഹന ഉടമകൾ തങ്ങളുടെ വാഹന തിരിച്ചറിയൽ നമ്പർ (VIN) തിരിച്ചുവിളിക്കൽ കാമ്പെയ്നിൽ ഉൾപ്പെടുത്തിയിട്ടുണ്ടോ എന്ന് പരിശോധിക്കണമെന്നും മന്ത്രാലയം നിർദ്ദേശിച്ചു.
