റിയാദ്: സൗദി അറേബ്യയിലെ ഭരണാധികാരികളുടെയും ഉന്നത ഉദ്യോഗസ്ഥരുടെയും ചിത്രങ്ങൾ ഉൽപന്നങ്ങളുടെ പരസ്യത്തിനായി ദുരുപയോഗം ചെയ്ത ഓൺലൈൻ സ്റ്റോർ ബ്ലോക്ക് ചെയ്തു. വാണിജ്യ മന്ത്രാലയമാണ് ഓൺലൈൻ സ്റ്റോറിനെതിരെ നടപടി സ്വീകരിച്ചത്. രാജ്യത്തെ നിയമങ്ങൾ ലംഘിച്ചുകൊണ്ട് വാണിജ്യ ആവശ്യങ്ങൾക്കായി ഔദ്യോഗിക ചിത്രങ്ങൾ ഉപയോഗിച്ചതിനെത്തുടർന്നാണ് മന്ത്രാലയത്തിന്റെ നടപടി.
ദേശീയ ചിഹ്നങ്ങളും ഭരണാധികാരികളുടെ ചിത്രങ്ങളും വാണിജ്യപരമായ ഇടപാടുകൾക്കായി ഉപയോഗിക്കുന്നത് നിയമപ്രകാരം തെറ്റാണ്. ഉൽപന്നങ്ങൾ, ലഘുലേഖകൾ, പ്രസിദ്ധീകരണങ്ങൾ, സമ്മാനങ്ങൾ എന്നിവയിൽ ഭരണാധികാരികളുടെയോ ഉദ്യോഗസ്ഥരുടെയോ ചിത്രങ്ങളും പേരുകളും ഉപയോഗിക്കാൻ പാടില്ല. ഇത്തരം നടപടികൾ ചട്ടങ്ങളുടെ വ്യക്തമായ ലംഘനമാണെന്ന് അധികൃതർ ചൂണ്ടിക്കാട്ടി. ഇത്തരത്തിലുള്ള നിയമ ലംഘനങ്ങൾ കണ്ടെത്തുന്നതിന് ഓൺലൈൻ സ്റ്റോറുകളിൽ മന്ത്രാലയം ശക്തമായ പരിശോധന നടത്തുന്നുണ്ട്. നിയമ ലംഘകർക്കെതിരെ ശക്തമായ നടപടികൾ സ്വീകരിക്കുമെന്ന് അധികൃതർ മുന്നറിയിപ്പ് നൽകി.
