മസ്കത്ത്: ഒമാനിലെ ദാഖിലിയ ഗവർണറേറ്റിലെ നിസ്വ പബ്ലിക് പാർക്ക് പൊതുജനങ്ങൾക്കായി തുറന്നു നൽകി. ഔദ്യോഗിക ഉദ്ഘാടനത്തിന് മുൻപ് സൗകര്യങ്ങളുടെയും സേവനകളുടെയും കാര്യക്ഷമത വിലയിരുത്താനും സന്ദർശകരുടെ അഭിപ്രായങ്ങൾ ശേഖരിച്ച് പ്രവർത്തനങ്ങൾ മെച്ചപ്പെടുത്താനും വേണ്ടിയാണ് ട്രയൽ ഓപ്പണിങ് നടത്തിയത്.
കുട്ടികൾക്കായി വിനോദ മേഖലകളും, ഫിറ്റ്നസ് സോണുകളും, ഇൻഡോർ ഇലക്ട്രിക് ഗെയിംസ് ഹാളും, കുടുംബങ്ങൾക്ക് അനുയോജ്യമായ പിക്നിക് ഫോറസ്റ്റും ഉൾപ്പെടെയുള്ളവ ഈ പാർക്കിൽ ഉണ്ട്. വിദ്യാഭ്യാസ മെഡിക്കൽ പാർക്കും പൊതു ഗ്രന്ഥശാലയും ആണ് പദ്ധതിയുടെ മറ്റൊരു പ്രത്യേകത. ആകെ 150,000 ചതുരശ്ര മീറ്റർ വിസ്തൃതിയിലായി വികസിപ്പിച്ച പാർക്കിൽ 24 നിക്ഷേപ അവസരങ്ങളാണ് ഗവർണറേറ്റ് ഒരുക്കുന്നത്. വിനോദവും നിക്ഷേപവും ഒരുമിച്ച് കൈകാര്യം ചെയ്യുന്ന സമഗ്ര നഗരസൗകര്യ വികസന നയത്തിലും ആണ് പദ്ധതിയുടെ രൂപകല്പന.
