ജിദ്ദ: കാലാവസ്ഥാ പ്രവചനങ്ങളിൽ എഐ സാങ്കേതികവിദ്യ പ്രയോജനപ്പെടുത്തി സൗദി അറേബ്യ. ഹജ്ജ് സീസണിൽ ഡിജിറ്റൽ, നൂതന സേവനങ്ങൾ മെച്ചപ്പെടുത്തുകയാണ് ലക്ഷ്യം. ബയാൻ എന്ന് പേരിട്ടിരിക്കുന്ന പുതിയ മോഡൽ ഇപ്പോൾ പരീക്ഷണ ഘട്ടത്തിലാണെന്നും ഈ വർഷം അവസാനത്തോടെ ഔദ്യോഗികമായി പുറത്തിറക്കുമെന്ന് പ്രതീക്ഷിക്കുന്നതായും അധികൃതർ അറിയിച്ചു.
അതേസമയം, തീർഥാടകർക്ക് നൽകുന്ന കാലാവസ്ഥാ സേവനങ്ങളുടെ ഗുണനിലവാരം വർധിപ്പിക്കാൻ പ്രത്യേക റിപ്പോർട്ടുകളും ബഹുഭാഷാ ആപ്ലിക്കേഷനും സൗദി നാഷണൽ സെന്റർ ഫോർ മെറ്റീരിയോളജി പുറത്തിറക്കി.
വിവിധ രാജ്യങ്ങളിലെ തീർഥാടകർക്ക് വിവരങ്ങൾ അറിയാൻ ഒമ്പത് ഭാഷകളുമായി അൻവാഅ് ആപ്ലിക്കേഷൻ ഈ വർഷം അപ്ഡേറ്റ് ചെയ്തിട്ടുണ്ടെന്ന് എൻസിഎമ്മിലെ ഗവേഷണ, വികസന, ഇന്നൊവേഷൻ ഡയറക്ടർ ജനറൽ ഡോ. തുർക്കി ഹബീബുല്ല വ്യക്തമാക്കി. തത്സമയ കാലാവസ്ഥാ വിവരം, ഉപഗ്രഹ ഇമേജറി, റഡാർ വിവരങ്ങൾ തുടങ്ങിയവ ആപ്പിലൂടെ നൽകുന്നുണ്ട്.
