റിയാദ്: വിദ്യാർത്ഥികൾക്ക് സമീകൃത പ്രഭാതഭക്ഷണം നൽകേണ്ടതിന്റെ പ്രധാന്യം ഉയർത്തിക്കാട്ടി സൗദി ഫുഡ് ആൻഡ് ഡ്രഗ് അതോറിറ്റി. ആരോഗ്യകരവും പോഷകസമൃദ്ധവുമായ പ്രഭാതഭക്ഷണം കുട്ടികൾക്ക് അവരുടെ വളർച്ച, പഠനം, ശാരീരിക പ്രവർത്തനങ്ങൾ, ഏകാഗ്രത എന്നിവയ്ക്ക് ആവശ്യമായ ഊർജ്ജവും അവശ്യ പോഷകങ്ങളും നൽകുന്നുവെന്ന് അതോറിറ്റി ചൂണ്ടിക്കാട്ടി. സ്കൂൾ വർഷാരംഭത്തിനായുള്ള മാർഗ്ഗനിർദ്ദേശങ്ങളിലാണ് അതോറിറ്റി ഇക്കാര്യം വ്യക്തമാക്കിയിരിക്കുന്നത്.
പ്രഭാതഭക്ഷണം കുട്ടികൾക്ക് വളർച്ചയ്ക്കും പഠനത്തിനും ശാരീരിക പ്രവർത്തനങ്ങൾക്കും ആവശ്യമായ ഊർജ്ജവും പോഷകങ്ങളും നൽകുന്നു. പഴങ്ങളും പച്ചക്കറികളും ഉൾപ്പെടുത്തുന്നത് അവരുടെ ഭക്ഷണക്രമം വൈവിധ്യവൽക്കരിക്കാൻ സഹായിക്കുകയും ആരോഗ്യകരമായ വളർച്ചയ്ക്കും മൊത്തത്തിലുള്ള ക്ഷേമത്തിനും സഹായിക്കുന്ന അവശ്യ വിറ്റാമിനുകൾ, ധാതുക്കൾ, നാരുകൾ എന്നിവ നൽകുകയും ചെയ്യുന്നുവെന്ന് അതോറിറ്റി അറിയിച്ചു.
പ്രഭാതഭക്ഷണത്തിൽ പാൽ അല്ലെങ്കിൽ പാലുൽപ്പന്നങ്ങൾ, ധാന്യങ്ങൾ, തവിടുപൊടി ധാന്യങ്ങൾ, പ്രോട്ടീന്റെ ഉറവിടം, പഴങ്ങൾ, പച്ചക്കറികൾ, മിതമായ അളവിൽ കൊഴുപ്പ് എന്നിവ ഉൾപ്പെടുത്തണമെന്ന് അതോറിറ്റി ശുപാർശ ചെയ്യുന്നു.
