ജുബൈൽ: ജുബൈലിൽ മലയാളി നഴ്‌സ് നിര്യാതയായി. പത്തനംതിട്ട തിരുവല്ല വള്ളക്കുളം സ്വദേശിനി ശ്രീലക്ഷ്മിയാണ് മരിച്ചത്. 35 വയസ്സായിരുന്നു. ജുബൈൽ അൽ മന ആശുപത്രിയിലെ അത്യാഹിത വിഭാഗം സ്റ്റാഫ് നഴ്‌സായി സേവനമനുഷ്ഠിച്ചു വരികയായിരുന്നു ശ്രീലക്ഷ്മി. പുലർച്ചെ നെഞ്ച് വേദന അനുഭവപ്പെട്ടതിനെ തുടർന്ന് ശ്രീലക്ഷ്മി ആശുപത്രിയിലെത്തി ചികിത്സ തേടിയെങ്കിലും മരണം സംഭവിക്കുകയായിരുന്നു.
ജുബൈൽ നവോദയ കലാസാംസ്‌കാരിക വേദി സാമൂഹികക്ഷേമ വിഭാഗം കൺവീനർ ശ്രീകുമാറിന്റെ ഭാര്യയാണ് ശ്രീലക്ഷ്മി. ജുബൈൽ ഇന്റർനാഷണൽ ഇന്ത്യൻ സ്‌കൂൾ അഞ്ചാം ക്ലാസ് വിദ്യാർത്ഥിനി ദേവികയാണ് ഇവരുടെ മകൾ. ശ്രീലക്ഷ്മിയുടെ മൃതദേഹം ജുബൈൽ അൽമന ആശുപത്രിയിലെ മോർച്ചറിയിൽ സൂക്ഷിച്ചിരിക്കുകയാണ്. മരണാനന്തര നടപടിക്രമങ്ങൾ പുരോഗമിക്കുകയാണെന്ന് അടുത്ത ബന്ധുക്കൾ അറിയിച്ചു.
