ജിദ്ദ: സൗദി അറേബ്യയിലെ വ്യാപാരം വിപുലീകരിക്കുന്നതിൻ്റെ ഭാഗമായി യുഎഇ ആസ്ഥാനമായുള്ള ലുലു ഗ്രൂപ്പ് വിശുദ്ധ നഗരങ്ങളായ മക്കയിലും മദീനയിലും രണ്ട് പുതിയ പദ്ധതികൾക്ക് രൂപം നൽകി. വിശുദ്ധ നഗരമായ മക്കയിൽ നടന്ന ഒപ്പുവയ്ക്കൽ ചടങ്ങിൽ ലുലു ഗ്രൂപ്പ് ചെയർമാൻ യൂസഫലി എംഎയാണ് ഇക്കാര്യം അറിയിച്ചത്.
ജബൽ ഒമർ ഡെവലപ്‌മെൻ്റ് കമ്പനി ചീഫ് എക്‌സിക്യൂട്ടീവ് ഓഫീസർ ഖാലിദ് അൽ അമൗദിയാണ് കരാറിൽ ഒപ്പുവെച്ചത്. അൽ മനാഖ അർബൻ പ്രോജക്ട് ഡെവലപ്‌മെൻ്റ് കമ്പനി (ദല്ല ഗ്രൂപ്പ്) സിഇഒ വലീദ് അഹമ്മദ് അൽ അഹമ്മദി, ലുലു ഗ്രൂപ്പ് കെഎസ്എ ഡയറക്ടർ ഷെഹിം മുഹമ്മദ് എന്നിവർ ചടങ്ങിൽ പങ്കെടുത്തു.
മക്കയിലെ ജബൽ ഒമർ 3-ലെ ആദ്യത്തെ ലുലു പ്രോജക്റ്റ് ഒരു സംയോജിത പദ്ധതിയാണ്, ഇതിലൂടെ സൂഖ് അൽ ഖലീലിൽ ലുലു സ്റ്റോർ സ്ഥാപിക്കാൻ ലക്ഷ്യമിടുന്നതാണ്. മക്ക മുഖറമയിലെ മസ്ജിദുൽ ഹറാമിൽ നിന്ന് നടക്കാവുന്ന ദൂരത്തിലാണ് പുതിയ സ്റ്റോർ. ആകെ 253,000 ചതുരശ്ര മീറ്റർ വിസ്തീർണ്ണത്തിലാണ് ജബൽ ഒമർ പദ്ധതി പൂർത്തീകരിക്കുന്നത്.
ഏഴ് ഘട്ടങ്ങളിലായി പദ്ധതി പൂർത്തീകരിക്കാനാണ് ലക്ഷ്യമിടുന്നതെന്ന് ലുലു ഗ്രൂപ്പ് അധികൃതർ വ്യക്തമാക്കി. ലോകമെമ്പാടുമുള്ള ദശലക്ഷക്കണക്കിന് തീർഥാടകർക്ക് മക്കയിലേക്ക് സേവനം നൽകുന്നതിന് ഹോട്ടലുകളും ബ്രാൻഡഡ് അപ്പാർട്ട്‌മെൻ്റുകളും മുഴുവൻ പ്രോജക്റ്റിലും ഉൾപ്പെടുത്തും. ഇതിലൂടെ ഈ മേഖല ലോകത്തിലെ ഏറ്റവും തിരക്കേറിയ തീർഥാടന കേന്ദ്രങ്ങളിലൊന്നായി മാറുന്നു. അൽ മനാഖ അർബൻ പ്രോജക്ട് ഡെവലപ്‌മെൻ്റ് കമ്പനി വികസിപ്പിച്ചുകൊണ്ടിരിക്കുന്ന അൽ മദീന അൽ മുനവാരയിലാണ് രണ്ടാമത്തെ ലുലു പദ്ധതി. 2161 ചതുരശ്ര മീറ്റർ വിസ്തൃതിയിലാണ് പദ്ധതി പൂർത്തീകരിക്കുന്നത്.
അതേസമയം മേഖലയിലെ പ്രമുഖ റീട്ടെയിൽ സ്ഥാപനമായ ലുലു ഈ അഭിമാനകരമായ ഷോപ്പിംഗ് പദ്ധതികളുടെ വിജയത്തിന് സംഭാവന നൽകുമെന്ന് ജബൽ ഒമർ ഡെവലപ്‌മെൻ്റ് കമ്പനിയുടെയും അൽ മനാഖ അർബൻ പ്രോജക്റ്റ് ഡെവലപ്‌മെൻ്റ് കമ്പനിയുടെയും ഉദ്യോഗസ്ഥർ ആത്മവിശ്വാസം പ്രകടിപ്പിച്ചു.
