ജിദ്ദ: സൗദി അറേബ്യയിലുടനീളം കനത്ത മഴയ്ക്കും വെള്ളപ്പൊക്കത്തിനും സാധ്യതയുണ്ടെന്ന് മുന്നറിയിപ്പ് നൽകി സിവിൽ ഡിഫൻസ്. ജനങ്ങൾ മുൻകരുതലുകൾ സ്വീകരിക്കണമെന്ന് അധികൃതർ ആവശ്യപ്പെട്ടു. വിവിധ മാധ്യമങ്ങളിലൂടെ ആശയവിനിമയം നടത്തുന്ന സുരക്ഷാ മാർഗ്ഗനിർദ്ദേശങ്ങൾ പാലിക്കണമെന്നും അധികൃതർ ജനങ്ങളോട് അഭ്യർത്ഥിച്ചു.
മക്ക മേഖലയിൽ ശക്തമായ മഴയും ആലിപ്പഴ വർഷവും ശക്തമായ കാറ്റും ഉണ്ടാകുമെന്നാണ് പ്രതീക്ഷിക്കുന്നത്. റിയാദ് മേഖലയിൽ നേരിയതോ കനത്തതോ ആയ മഴ ലഭിക്കുമെന്നും കാലാവസ്ഥ വിദഗ്ധർ പ്രവചിച്ചു. മദീന, ഹായിൽ, ഖസിം, വടക്കൻ അതിർത്തികൾ, കിഴക്കൻ മേഖല, അൽ-ബഹ, അസീർ, ജിസാൻ, നജ്റാൻ എന്നിവയാണ് കാര്യമായ മഴയെ ബാധിക്കാൻ സാധ്യതയുള്ള മറ്റ് പ്രദേശങ്ങൾ. തബൂക്ക്, അൽ ജൗഫ് മേഖലകളിൽ നേരിയ മഴ പെയ്‌തേക്കാമെന്നും മുന്നറിയിപ്പുണ്ട്.
