രണ്ട് മാസത്തിലേറെ നീണ്ട വേനലവധിക്കു ശേഷം സ്കൂളുകൾ തുറക്കാനിരിക്കെ സ്കൂൾ സാമഗ്രികൾ വിൽക്കുന്ന കടകൾ സജീവമായി. അടുത്തയാഴ്ച ആരംഭിക്കുന്ന പുതിയ അധ്യയന വർഷത്തിനായുള്ള തയാറെടുപ്പിലാണ് കുട്ടികൾ. തിരക്കേറുന്നതിന് മുമ്പ് ആവശ്യമായ സ്കൂൾ സാമഗ്രികൾ വാങ്ങാൻ വിദ്യാർഥികളും കുടുംബങ്ങളും മാർക്കറ്റുകളിൽ നേരത്തേ എത്തിക്കൊണ്ടിരിക്കുകയാണ്.
ബുക്ക് സ്റ്റാളുകളും സ്റ്റേഷനറി സ്റ്റോറുകളും എല്ലാ തരത്തിലുമുള്ള സ്കൂൾ സപ്ലൈസ് നൽകുന്നതിനും വിദ്യാർഥികളും രക്ഷിതാക്കളും ഉൾപ്പെടെയുള്ള ഉപഭോക്താക്കളെ സ്വീകരിക്കാനും അവരുടെ ആവശ്യങ്ങൾ നിറവേറ്റാനുമുള്ള ഒരുക്കം പൂർത്തിയാക്കിയിട്ടുണ്ട്. പല തലം ബ്രാൻഡുകളും വിദ്യാർഥികളെ ആകർഷിക്കുന്ന പുതിയ മോഡലും കടയുടമകൾ ഒരുക്കിയിട്ടുണ്ട്.
ഇതിന് മുന്നോടിയായി ഔട്ട്‌ലെറ്റുകളിൽ വാണിജ്യ മന്ത്രാലയം പരിശോധന കർശനമാക്കി. സ്കൂൾ ഉൽപന്നങ്ങളുടെയും സാധനങ്ങളുടെയും ലഭ്യതയും അവയുടെ ബദലുകളും പരിശോധിക്കാനാണ് ഇതെന്ന് മന്ത്രാലയം വിശദീകരിച്ചു.
ഉൽപന്നങ്ങളിൽ വില രേഖപ്പെടുത്തിയ ടാഗുകളുണ്ടെന്നും വില അക്കൗണ്ടിങ് ഉപകരണങ്ങളിൽ രേഖപ്പെടുത്തിയിരിക്കുന്ന വിലകളിൽനിന്ന് വ്യത്യസ്തമല്ലെന്നും ഉൽപന്നങ്ങളുടെ വിശദാംശങ്ങൾ അറബിയിൽ വ്യക്തമായി എഴുതിയിട്ടുണ്ടെന്നും ഉറപ്പാക്കുന്നതിനാണ് പരിശോധന.
ഡിസ്കൗണ്ടുകൾ, പ്രമോഷനുകൾ എന്നിവ ക്രമമായി നടക്കുന്നുണ്ടെന്ന് മന്ത്രാലയത്തിന്റെ നിരീക്ഷണസംഘം ഉറപ്പ് വരുത്തുമെന്ന് മന്ത്രാലയം പറഞ്ഞു. സ്കൂൾ ഉൽപന്നങ്ങളുടെ ഔട്ട്‌ലെറ്റുകൾ മന്ത്രാലയത്തിന്റെ നിയന്ത്രണങ്ങൾ പാലിക്കണമെന്നും നിയമലംഘകർക്ക് പിഴ ചുമത്തുമെന്നും മന്ത്രാലയം മുന്നറിയിപ്പ് നൽകി.
