ജിദ്ദ – ലോകമെമ്പാടുമുള്ള 160-ലധികം രാജ്യങ്ങളിൽ നിന്നുള്ള 20 ലക്ഷത്തിലധികം തീർത്ഥാടകർ ഈ വർഷം ഹജ്ജ് നിർവഹിക്കുമെന്ന് ഹജ്ജ്, ഉംറ മന്ത്രി ഡോ. തൗഫീഖ് അൽ-റബിയ പറഞ്ഞു. ഹജ്ജ് തീർഥാടനത്തിനായി രാജ്യത്തേക്ക് വരുന്നവരുടെ വിമാന റിസർവേഷൻ 1.7 ദശലക്ഷമാണെന്ന് അദ്ദേഹം അറിയിച്ചു.
മന്ത്രാലയത്തിന്റെ ഔദ്യോഗിക അക്കൗണ്ടിൽ ദൈവത്തിന്റെ അതിഥികളെ സ്വാഗതം ചെയ്യുന്ന ചിത്രം പ്രകാശനം ചെയ്ത ശേഷമാണ് മന്ത്രി ഇക്കാര്യം വ്യക്തമാക്കിയത്. തീർഥാടകർക്ക് സേവനം നൽകുന്ന ആരോഗ്യപ്രവർത്തകരുടെ എണ്ണം 32,000 കവിഞ്ഞതായി അദ്ദേഹം പറഞ്ഞു. “ഏതാനും ദിവസങ്ങൾക്കുള്ളിൽ, ലോകമെമ്പാടുമുള്ള ദശലക്ഷക്കണക്കിന് മുസ്ലീങ്ങൾ മഹത്തായ തല്ബിയ ചൊല്ലും. ദൈവത്തിന്റെ അതിഥികൾക്ക് തടസ്സമില്ലാത്ത ഹജ്ജ് നിർവഹിക്കുന്നതിന് സൗദി അറേബ്യയിലെ സർക്കാരും ജനങ്ങളും പങ്കാളികളാകുന്നതായും അദ്ദേഹം പറഞ്ഞു.
സൗദി ഭരണാധികാരി സൽമാൻ രാജാവിനും കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാനും ദൈവത്തിന്റെ അതിഥികൾക്ക് നൽകുന്ന സേവനങ്ങൾക്ക് അൽ-റബിയ നന്ദി അറിയിച്ചു.
