ജിദ്ദ: സൗദിയിലെ ജിദ്ദയിൽ കടൽ യാത്രാനുഭവം കൂടുതൽ മനോഹരമാക്കാൻ ലക്ഷ്യമിട്ടുള്ള ലക്ഷ്വറി വാട്ടർ ടാക്സി സേവനത്തിന് തുടക്കം കുറിച്ചു. പുതിയ യാത്ര സംവിധാനം ഒരുക്കിയിരിക്കുന്നത് ജിദ്ദ ട്രാൻസ്പോർട്ട് കമ്പനിയുടെ കീഴിലാണ്. ട്രാൻസ്പോർട്ട് അതോറിറ്റി പ്രസിഡന്റ് എഞ്ചിനീയർ ഫവാസ് അൽ സാഹ് ലി, ജിദ്ദ മേയർ സാലിഹ് അൽ തുർക്കി തുടങ്ങിയവർ ഉദ്ഘാടന ചടങ്ങിൽ പങ്കെടുത്തു.
നിലവിൽ ഈ സേവനം പ്രവർത്തിക്കുന്നത് ജിദ്ദ യാച്ച് ക്ലബ്ബിനെ കേന്ദ്രീകരിച്ചാണ്. വരും ദിവസങ്ങളിൽ ജിദ്ദ കോർണിഷിലെ കൂടുതൽ സ്ഥലങ്ങളിലേക്ക് ഈ സേവനം വ്യാപിപ്പിക്കുന്നതാണ്. മികച്ച ഡിസൈനും അത്യാധുനിക സാങ്കേതിക വിദ്യയുമാണ് ഈ ആഡംബര ബോട്ടുകളുടെ മറ്റൊരു സവിശേഷത.
യാത്രക്കാർക്ക് സുഖകരവും സുരക്ഷിതവുമായ യാത്ര ഉറപ്പാക്കാൻ ഈ ബോട്ടുകൾ സഹായിക്കും. മേഖലയിലെത്തുന്ന വിനോദസഞ്ചാരികൾക്കും സന്ദർശകർക്കും മികച്ച അനുഭവം തന്നെയായിരിക്കും ഈ ബോട്ടുകളിലൂടെയുള്ള സഞ്ചാരം.
