മക്ക: സൗദിയിൽ അസീസിയയിലുണ്ടായ തീപിടിത്തത്തിൽ പുക ശ്വസിച്ച് മലയാളി ഉൾപ്പെടെ മൂന്ന് പ്രവാസികൾ മരണപ്പെട്ടു. കാസർകോട് സ്വദേശി പി പി മുഹമ്മദ് കുഞ്ഞി ആണ് മരിച്ച മലയാളി. മക്ക അസീസിയയിലെ ഉമ്മുൽ ഖുറാ യൂണിവേഴ്സിറ്റിക്ക് സമീപമുള്ള കെട്ടിടത്തിലായിരുന്നു അപകടം.
കെട്ടിടത്തിൽ തീപിടുത്തമുണ്ടായതിനെ തുടർന്ന് മുറിയിലേക്ക് പടർന്ന കനത്ത പുക ശ്വസിച്ച് ശ്വാസംമുട്ടിയാണ് മരണം സംഭവിച്ചത്. അപകടത്തിൽ മരിച്ച മറ്റ് പ്രവാസികൾ ബംഗ്ലാദേശ് സ്വദേശികളാണെന്നാണ് റിപ്പോർട്ടുകൾ. മക്കയിൽ കെഎംസിസിയുടെ സാമൂഹിക സേവന രംഗങ്ങളിൽ സജീവ സാന്നിധ്യമായിരുന്നു അദ്ദേഹം.
നിലവിൽ അൽ നൂർ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം, നിയമനടപടികൾ പൂർത്തിയാക്കിയ ശേഷം മക്കയിൽ തന്നെ ഖബറടക്കുമെന്ന് ബന്ധുക്കൾ അറിയിച്ചു.
