മക്ക: ഹജ്ജ് ചട്ടങ്ങളും നിർദ്ദേശങ്ങളും ലംഘിച്ച് മൂന്ന് ഈജിപ്തുകാരെ മക്കയിലേക്ക് കടത്തിയ ഒരു സൗദി പൗരൻ ഹജ്ജ് സുരക്ഷാ സേന അറസ്റ്റ് ചെയ്തു. ഹജ്ജ് പെർമിറ്റ് ലഭിക്കാതെ താഴ്വരകളിലൂടെ സുരക്ഷാ ചെക്ക്പോസ്റ്റുകൾ മറികടന്ന് ഈജിപ്തുകാരെ മക്കയിലേക്ക് കടത്താൻ ശ്രമിക്കുന്നതിനിടെയാണ് നാലുപേരെയും പിടികൂടിയത്. അറസ്റ്റിലായവർക്കെതിരെ നിയമ നടപടികൾ സ്വീകരിച്ചു.
ഹജ്ജ് ചട്ടങ്ങളും നിർദ്ദേശങ്ങളും പാലിക്കണമെന്നും മക്ക, മദീന, റിയാദ്, കിഴക്കൻ പ്രവിശ്യ എന്നിവിടങ്ങളിലെ നിയമലംഘനങ്ങൾ 911 എന്ന നമ്പറിലോ രാജ്യത്തിന്റെ മറ്റ് ഭാഗങ്ങളിൽ 999 എന്ന നമ്പറിലോ വിളിച്ച് റിപ്പോർട്ട് ചെയ്യണമെന്നും പൊതു സുരക്ഷാ വിഭാഗം ജനങ്ങളോട് അഭ്യർത്ഥിച്ചു.
