റിയാദ്: പാചകവാതകം ഉപയോഗിക്കുമ്പോൾ ശ്രദ്ധിക്കേണ്ട മുൻകരുതൽ നടപടികൾ വിശദീകരിച്ച് സൗദി അറേബ്യ. വീടുകളിലും വിവിധ സ്ഥാപനങ്ങളിലും അശ്രദ്ധമായ എൽ.പി.ജി ഉപയോഗം കൊണ്ട് ഉണ്ടായേക്കാവുന്ന അപടകങ്ങൾ തടയുന്നതിന്റെ ഭാഗമായാണ് സൗദി സിവിൽ ഡിഫൻസ് അധികൃതർ ഇതുസംബന്ധിച്ച നിർദ്ദേശം നൽകിയത്. സൗദിയിൽ കനത്ത ചൂട് അനുഭവപ്പെടുന്ന സാഹചര്യത്തിലാണ് മന്ത്രാലയം മുന്നറിയിപ്പുമായി രംഗത്തെത്തിയത്.
മുൻകരുതൽ നടപടികളും മാർഗനിർദ്ദേശങ്ങളും:
സുരക്ഷിതമായ സ്ഥലം തെരഞ്ഞെടുക്കുക: കനത്ത ചൂട് തുടരുന്നതിനാൽ ഗ്യാസ് സിലിണ്ടറുകൾ നേരിട്ട് വെയിൽ അടിക്കാത്തതും വായുസഞ്ചാരമുള്ളതുമായ സുരക്ഷിതമായ സ്ഥലങ്ങളിൽ സ്ഥാപിക്കണം
അടുപ്പുകൾ പരിശോധിക്കുക: ഓവനുകളും ഗ്യാസ് സ്റ്റൗവുകളും കൃത്യമായ ഇടവേളകളിൽ സർവീസ് ചെയ്യണം
പൈപ്പുകളുടെ സുരക്ഷ: ഗ്യാസ് കണക്ഷൻ നൽകിയിരിക്കുന്ന പൈപ്പുകൾ കേടുപാടുകൾ ഇല്ലാത്തതാണെന്ന് ഉറപ്പുവരുത്തുകയും കൃത്യമായ കാലയളവിൽ പരിശോധിക്കുകയും വേണം
ഉപയോഗത്തിന് ശേഷം ഓഫ് ചെയ്യുക: പാചകം കഴിഞ്ഞയുടനും അടുക്കളയിൽ നിന്ന് പുറത്തുപോകുമ്പോഴും ഗ്യാസ് സിലിണ്ടറിന്റെ റെഗുലേറ്റർ ഓഫ് ചെയ്തിട്ടുണ്ടെന്ന് ഉറപ്പുവരുത്തണം
ഡിറ്റക്ടറുകൾ സ്ഥാപിക്കുക: ഗ്യാസ് ചോർച്ച പെട്ടെന്ന് തിരിച്ചറിയാൻ സഹായിക്കുന്ന ‘ഗ്യാസ് ലീക്ക് ഡിറ്റക്ടറുകൾ’ അടുക്കളകളിൽ സ്ഥാപിക്കുന്നത് വഴി വലിയ അപകടങ്ങൾ ഒഴിവാക്കാൻ സാധിക്കും.
രാജ്യത്ത് എവിടെയെങ്കിലും ഗ്യാസ് ചോർച്ചയോ മറ്റ് അപകടങ്ങളോ ഉണ്ടായാൽ അടിയന്തര നമ്പറുകളിൽ ബന്ധപ്പെടണമെന്ന് സിവിൽ ഡിഫൻസ് ഓർമ്മിപ്പിച്ചു. മക്ക, മദീന, റിയാദ്, കിഴക്കൻ പ്രവിശ്യ എന്നിവിടങ്ങളിലുള്ളവർ 911ലും മറ്റു പ്രവിശ്യകളിലുള്ളവർ 998ലുമാണ് ബന്ധപ്പെടേണ്ടത്.
