റിയാദ്: രാജ്യത്തേക്ക് ഹൗസ് ഡ്രൈവർ വിസ സ്റ്റാമ്പ് ചെയ്യുന്നതിനും തൊഴിൽ നൈപുണ്യ പരീക്ഷ നിർബന്ധമാക്കി സൗദി അറേബ്യ. ഇന്ന് മുതൽ നിയമം പ്രാബല്യത്തിൽ വരും. മുംബെയിലെ സൗദി കോൺസുലേറ്റാണ് ഇത് സംബന്ധിച്ച ഉത്തരവിറക്കിയത്.
വിസ സ്റ്റാമ്പിങിന് മുമ്പ് പരീക്ഷ നടപടികൾ പൂർത്തിയാക്കിയിരിക്കണമെന്ന് റിക്രൂട്ടിംഗ് ഏജൻസികൾക്ക് നിർദേശം നൽകി. നിലവിൽ കേരളത്തിൽ പരീക്ഷ സെൻററുകൾ ഇല്ല. തമിഴ് നാട്ടിലും മറ്റ് ഉത്തരേന്ത്യൻ സംസ്ഥാനങ്ങളിലുമാണ് ഇതിനുള്ള സൗകര്യമുള്ളത്. രാജ്യത്തെ തൊഴിൽ വിപണിയുടെ സുതാര്യതയും കാര്യക്ഷമതയും ഉറപ്പ് വരുത്തുന്നതിന്റെ ഭാഗമായാണ് നടപടി. ഇതിനകം മറ്റുള്ള എല്ലാ തസ്തികകളിലേക്കും തൊഴിൽ നൈപുണ്യ പരീക്ഷ നിർബന്ധമാക്കിയിരുന്നു. നാളെ മുതൽ ഗാർഹിക വിസകൾക്കും ഇത് ബാധകമായിരിക്കും.
സൗദിയിലേക്കുള്ള ഹൗസ് ഡ്രൈവർ വിസകളുടെ നടപടി ക്രമങ്ങൾ പൂർത്തിയാക്കുന്നതിന് മുമ്പ് തൊഴിലന്വേഷകൻ പരീക്ഷ നടപടികൾ പൂർത്തിയാക്കണം. ശേഷം യോഗ്യത തെളിയിക്കുന്ന സർട്ടിഫിക്കറ്റ് കൂടി ഹാജരാക്കണമെന്നാണ് കോൺസുലേറ്റ് റിക്രൂട്ടിംഗ് ഏജൻസികൾക്ക് നൽകിയിരിക്കുന്ന നിർദ്ദേശം.
