റിയാദ്: അബ്ഷീർ പ്ലാറ്റ്ഫോമിൽ പാസ്പോർട്ട് വിസ സേവങ്ങളിൽ സാങ്കേതിക തടസ്സമുണ്ടായാൽ തവാസുൽ സർവീസ് ഉപയോഗപ്പെടുത്താമെന്ന് സൗദി അറേബ്യ. പാസ്പോർട്ട് വിഭാഗമാണ് ഇക്കാര്യം അറിയിച്ചത്. ആവശ്യമായ രേഖകളും വിശദീകരണവും ഇതിനൊപ്പം നൽകണം. ഈ സേവനം ഉപയോഗിക്കേണ്ടത് സൗദയിൽ സ്വദേശികൾക്കും പ്രവാസികൾക്കും സർക്കാർ സേവനങ്ങൾ ലഭ്യമാക്കുന്ന അബ്ഷീർ പ്ലാറ്റ്ഫോമിൽ തടസ്സം നേരിട്ടാൽ മാത്രമാണ്.
അബ്ഷീർ പ്ലാറ്റ്ഫോമിലെ ജവാസാത്ത് അഥവാ പാസ്പോർട്ട് വിഭാഗവുമായി ബന്ധപ്പെട്ട സേവനങ്ങൾ ഓൺലൈനായി ചെയ്യാൻ ശ്രമിക്കുമ്പോഴുണ്ടാകുന്ന ടെക്നിക്കൽ പ്രശ്നങ്ങൾ പരിഹരിക്കാൻ അപേക്ഷിക്കേണ്ട ഒരു ചാനലാണ് ഇത്. സാധാരണയായി ലഭ്യമായ സേവനങ്ങൾ ഓട്ടോമാറ്റിക്കായി പൂർത്തിയാകാത്തപ്പോൾ മാത്രമേ ഈ സേവനം ഉപയോഗിക്കാവൂ. പാസ്പോർട്ട് വിവരങ്ങൾ അപ്ഡേറ്റ് ചെയ്യൽ, യാത്രാ അനുമതിയുമായി ബന്ധപ്പെട്ട കാര്യങ്ങൾ, ഇഖാമ നടപടികൾ, ആശ്രിതർക്കും സ്പോൺസർ ചെയ്തവർക്കുമുള്ള സേവനങ്ങൾ, രാജ്യത്തിന് പുറത്തുള്ളവർക്കുള്ള ഇഖാമ നടപടികൾ എന്നിവ പൂർത്തിയാക്കാൻ അബ്ഷിർ വഴി സാധിക്കാതെ വന്നാൽ തവാസുൽ ഉപയോഗിക്കാം. എക്സിറ്റ്-റി എൻട്രി വിസയും ഫൈനൽ എക്സിറ്റ് വിസയും, വിസിറ്റ് വിസകൾ, യെമൻ, സിറിയ തുടങ്ങിയ രാജ്യങ്ങളിൽ നിന്നുള്ളവർക്കുള്ള വിസിറ്റ് വിസ നീട്ടൽ, സേവന കൈമാറ്റം, തൊഴിൽ മാറ്റം, പാസ്പോർട്ട് അപ്ഡേറ്റ് ചെയ്യലും നീട്ടലും, റിപ്പോർട്ടുകൾ എന്നിവയുമായി ബന്ധപ്പെട്ട പ്രശ്നങ്ങൾക്കും തവാസുൽ വഴി അഭ്യർഥന നൽകാം.
