തബൂക്ക്: വ്യാപാര സ്ഥാപനങ്ങളിൽ പരിശോധനകൾ കടുപ്പിച്ച് തബൂക്ക് റീജിയൺ മുൻസിപ്പാലിറ്റി. 1.14 ലക്ഷം ഫീൽഡ് പരിശോധനകളാണ് ഈ വർഷം ആദ്യ പകുതിയിൽ നടത്തിയത്. ലൈസൻസിങ് ആൻഡ് കംപ്ലയൻസ് ഏജൻസിയുടെ നേതൃത്വത്തിലാണ് പരിശോധന. നഗരസഭാ നിയമങ്ങൾ കൃത്യമായി പാലിക്കുന്നുണ്ടെന്ന് ഉറപ്പുവരുത്താൻ വേണ്ടി നടത്തിയ ഈ വ്യാപക പരിശോധനകൾ വ്യാപാരികൾക്കിടയിൽ നിയമവിധേയത്വം വളർത്തുന്നതിൽ വലിയ പങ്കുവഹിക്കുന്നുണ്ട്.
കൃത്യമായ നിരീക്ഷണവും ഫീൽഡ് ഇൻസ്പെക്ഷനുകളും വഴി വ്യാപാരികളുടെ നിയമപാലന തോത് 81 ശതമാനത്തിലേക്ക് എത്തിക്കാൻ മുൻസിപ്പാലിറ്റിയ്ക്ക് കഴിഞ്ഞു. പൊതുജനങ്ങളിൽ നിന്ന് ‘940’ കോൾ സെന്റർ വഴി ലഭിച്ച 3,800 പരാതികൾക്ക് ഉടനടി പരിഹാരം കണ്ടുവെന്നും സാധാരണയായി 24 മണിക്കൂർ വരെയെടുക്കുന്ന പരാതി പരിഹാര സമയം ശരാശരി ഒൻപത് മണിക്കൂറായി കുറയ്ക്കാനായത് വലിയ നേട്ടമാണെന്നും അധികൃതർ കൂട്ടിച്ചേർത്തു.
