റിയാദ്: സൗദിയിൽ ഒരു കോടിയിലധികം ഉൽപ്പന്നങ്ങൾക്ക് വിലക്കുറവ് ഓഫർ. ദേശീയ ദിനത്തോടനുബന്ധിച്ചാണ് സൗദി അറേബ്യ ഉത്പന്നങൾക്ക് വിലക്കുറവ് ഓഫർ നൽകുന്നത്. വിവിധ സ്ഥാപനങ്ങൾക്കായി 3,500ലേറെ ഡിസ്കൗണ്ട് ലൈസൻസുകൾ അനുവദിച്ചിട്ടുണ്ട്. വിലക്കുറവ് നിയമങ്ങൾ പാലിക്കുന്നുണ്ടെന്ന് ഉറപ്പാക്കാൻ രാജ്യവ്യാപകമായ ശക്തമായ പരിശോധന നടത്തുമെന്ന് സൗദി വാണിജ്യ മന്ത്രാലയം അറിയിച്ചു.
ലൈസൻസ് ഉപയോഗിച്ച് സ്ഥാപനത്തിന്റെ എല്ലാ ശാഖകളിലും വിൽപ്പന കേന്ദ്രങ്ങളിലും വിലക്കുറവ് നൽകാൻ കഴിയും. ഡിസ്കൗണ്ട് ലൈസൻസിൽ നൽകിയിരിക്കുന്ന ഏകീകൃത ഇലക്ട്രോണിക് ബാർകോഡ് വഴി വിലക്കുറവിന്റെ ശതമാനം, കാലാവധി, സ്ഥാപനത്തിന്റെ വിവരങ്ങൾ തുടങ്ങിയവ ഉപഭോക്താവിന് അറിയാൻ കഴിയും. ദേശീയ ദിനാഘോഷങ്ങളുടെ ഭാഗമായി അനുവദിക്കുന്ന വിലക്കുറവുകൾ സ്ഥാപനങ്ങളുടെ വാർഷിക ഡിസ്കൗണ്ട് പരിധിയിൽ ഉൾപ്പെടില്ലെന്നും മന്ത്രാലയം വ്യക്തമാക്കി.
