റിയാദ്: സൗദി അറേബ്യയിലെ പല പ്രദേശങ്ങളിലും ശക്തമായ മഴയും ഇടിമിന്നലും വെള്ളപ്പൊക്കവും ഉണ്ടാകുമെന്ന് മുന്നറിയിപ്പ്. ജിസാൻ, മക്ക, അൽ-ബഹ എന്നിവിടങ്ങളിൽ റെഡ് അലേർട്ട് പ്രഖ്യാപിച്ചു. ശക്തമായ ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്ന് നാഷണൽ സെന്റർ ഫോർ മെറ്റീരിയോളജി (എൻസിഎം) അറിയിച്ചു.
ജസാൻ, അസീർ, അൽ-ബഹ, മക്ക എന്നിവയുടെ ചില ഭാഗങ്ങളിൽ മിതമായതോ കനത്തതോ ആയ ഇടിമിന്നലോടുകൂടിയ മഴയും ആലിപ്പഴ വർഷവും പൊടിയും മണലും ഇളക്കിവിടുന്ന സജീവമായ കാറ്റും പ്രതീക്ഷിക്കുന്നു. മദീന, ഹായിൽ, തബൂക്ക്, അൽ-ജൗഫ്, വടക്കൻ അതിർത്തികൾ, റിയാദ്, കിഴക്കൻ പ്രവിശ്യ എന്നിവിടങ്ങളിൽ നേരിയതോ മിതമായതോ ആയ മഴ പ്രതീക്ഷിക്കാം.
കിഴക്കൻ, പടിഞ്ഞാറൻ സൗദി അറേബ്യയുടെ തീരപ്രദേശങ്ങളിൽ രാത്രിയിലും പുലർച്ചെയും മൂടൽമഞ്ഞ് രൂപപ്പെടാൻ സാധ്യതയുണ്ട്. മക്ക, മദീന, ദമ്മാം എന്നിവിടങ്ങളിൽ ഏറ്റവും ഉയർന്ന താപനില 39°C ആയിരിക്കുമെന്നും റിയാദ്, ബുറൈദ എന്നിവിടങ്ങളിൽ 37°C ആയിരിക്കുമെന്നും പ്രവചിക്കപ്പെടുന്നു.
