റിയാദ്: വിവിധ രാജ്യങ്ങളിൽ നിന്ന് ഇറക്കുമതി ചെയ്യുന്ന ചോക്ലേറ്റുകൾ ഉൾപ്പെടെയുള്ള എല്ലാ ഭക്ഷ്യോൽപന്നങ്ങളും കർശന പരിശോധനകൾക്കും നിയന്ത്രണങ്ങൾക്കും വിധേയമാക്കുന്നുണ്ടെന്ന് വ്യക്തമാക്കി സൗദി ഫുഡ് ആന്റ് ഡ്രഗ് അതോറിറ്റി. സുരക്ഷിതത്വവും അംഗീകൃത സാങ്കേതിക മാനദണ്ഡങ്ങളും പാലിക്കുന്നുണ്ടോ എന്ന് ഉറപ്പുവരുത്തിയതിന് ശേഷമാണ് ഉൽപന്നങ്ങൾ വിപണിയിലെത്തിക്കുന്നതെന്ന് അതോറിറ്റി അറിയിച്ചു.
രാജ്യത്തെ വിപണിയിൽ ലഭ്യമായിരുന്ന ചില പ്രമുഖ ചോക്ലേറ്റ് ഉത്പ്പന്നങ്ങളുടെ നിർമാണം മറ്റ് രാജ്യങ്ങളിലേക്ക് മാറ്റിയിരുന്നു. ഇതിന് പിന്നാലെ, വിപണിയിൽ ലഭ്യമാകുന്ന ഉത്പ്പന്നങ്ങളുടെ ഗുണനിലവാരത്തിലും രുചിയിലും മുമ്പത്തേക്കാൾ കുറവുണ്ടായെന്ന പരാതികൾ ഉയർന്നു വന്നിരുന്നു. ഇതിന്റെ പശ്ചാത്തലത്തിലാണ് അതോറിറ്റി ഇതുസംബന്ധിച്ച വിശദീകരണം നൽകുന്നത്.
വിപണിയിലുള്ള ഉത്പ്പന്നങ്ങളുടെ സുരക്ഷ ഉറപ്പാക്കുന്നതിനും ഉപഭോക്താക്കളുടെ ആരോഗ്യം സംരക്ഷിക്കുന്നതിനുമായി കർശന നടപടികളാണ് സ്വീകരിക്കുന്നത്. പരിശോധനയ്ക്കായി ശേഖരിക്കുന്ന സാമ്പിളുകളിൽ അനുവദിക്കുന്ന പരിധിയിലും കൂടുതൽ ഘടകങ്ങളോ മാനദണ്ഡ ലംഘനങ്ങളോ കണ്ടെത്തിയാൽ, ഉടൻ തന്നെ ആവശ്യമായ നടപടികൾ സ്വീകരിക്കുമെന്നും അതോറിറ്റി കൂട്ടിച്ചേർത്തു.
