റിയാദ്: മക്കയിലും കിഴക്കൻ പ്രവിശ്യയിലുമുള്ള വിവിധ കേന്ദ്രങ്ങളിലും സന്ദർശനം നടത്തി സൗദി ഫുഡ് ആൻഡ് ഡ്രഗ് അതോറിറ്റി സി.ഇ.ഒ ഹിഷാം ബിൻ സാദ് അൽ-ജദ്. തീർഥാടകർക്ക് ലഭ്യമാകുന്ന ഭക്ഷണസാധനങ്ങളുടെയും മരുന്നുകളുടെയും സുരക്ഷ ഉറപ്പാക്കുന്നതിനുള്ള ഒരുക്കങ്ങൾ വിലയിരുത്തുന്നതിനായാണ് അദ്ദേഹത്തിന്റെ സന്ദർശനം. ജിദ്ദയിലെ കിങ് അബ്ദുൽ അസീസ് അന്താരാഷ്ട്ര വിമാനത്താവളത്തിലെ എയർ കാർഗോ സൗകര്യങ്ങളും ഹജ്ജ് ടെർമിനലും സന്ദർശിച്ച അദ്ദേഹം, മരുന്നുകളും മെഡിക്കൽ ഉപകരണങ്ങളും പരിശോധിക്കുന്നതിനുള്ള സംവിധാനങ്ങൾ നേരിട്ട് കണ്ട് വിലയിരുത്തി.
ഭക്ഷ്യ സുരക്ഷാ ലാബുകളിലെ സാങ്കേതിക വിദ്യകളും ലാബ് പരിശോധനകളുടെ വേഗതയും അദ്ദേഹം വിലയിരുത്തിയിട്ടുണ്ട്. ഹജ്ജ് ടെർമിനലിലെ ഹെൽത്ത് കൺട്രോൾ സെന്ററിന്റെയും അതോറിറ്റി ഓഫീസിന്റെയും പ്രവർത്തനങ്ങളിൽ അദ്ദേഹം സംതൃപ്തി രേഖപ്പെടുത്തി. ഉത്പ്പന്നങ്ങളുടെ ഗുണനിലവാരം ഉറപ്പാക്കാൻ പരിശ്രമിക്കുന്ന ഉദ്യോഗസ്ഥരെ അദ്ദേഹം അഭിനന്ദിക്കുകയും ചെയ്തു.
