റിയാദ്: സൗദിയിൽ പരിസ്ഥിതി നിയമങ്ങൾ ലംഘിച്ച കോഴി ഫാമിന് 5000 റിയാൽ പിഴ. സൗദി അറേബ്യയിലെ ഖസീം പ്രവിശ്യയിലാണ് സംഭവം. അബ്ദുൽ അസീസ് അഹമ്മദ് അൽ-ഫലീയു എന്ന ഫാമിനാണ് കോടതി പിഴ ചുമത്തിയിരിക്കുന്നത്. മലിനജലവും പൗൾട്രി അവശിഷ്ടങ്ങളും പുറത്തേക്ക് തള്ളിയെന്നാണ് സ്ഥാപനത്തിനെതിരെയുള്ള കുറ്റം.
പ്രദേശത്തെ നാശനഷ്ടങ്ങൾ പരിഹരിക്കാനും പരിസ്ഥിതി മാനദണ്ഡങ്ങൾ പാലിച്ച് പ്രദേശം വൃത്തിയാക്കി പഴയപടിയാക്കാനും അധികൃതർ ഫാം ഉദ്യോഗസ്ഥർക്ക് കർശന നിർദ്ദേശം നൽകി. ഫാമിലെ മലിനജലവും അവശിഷ്ടങ്ങളും നേരിട്ട് മണ്ണിലേക്ക് ഒഴുക്കി വിട്ടതിലൂടെ മണ്ണ് മലിനമായെന്നും പരിസ്ഥിതി നാശം സംഭവിച്ചെന്നും കോടതി കണ്ടെത്തി.
കോടതി വിധിയുടെ പകർപ്പ് നിയമലംഘനം നടത്തിയ സ്ഥാപനം സ്വന്തം ചെലവിൽ പരസ്യപ്പെടുത്തുകയും ചെയ്യണം.
