റിയാദ്: 22 ഇനം ഫീഡിംഗ് ബോട്ടിലുകൾ വിപണിയിൽ നിന്നും തിരിച്ചുവിളിച്ച് സൗദി അറേബ്യ. കുട്ടികൾക്ക് ഉപയോഗിക്കുന്ന ‘NURSH 8oz Reusable Baby Bottles’ എന്ന ബ്രാൻഡിന്റെ 22 ഉൽപന്നങ്ങളാണ് വിപണിയിൽ നിന്ന് സൗദി വാണിജ്യ മന്ത്രാലയം തിരിച്ചുവിളിച്ചത്. ഇവയുടെ ഉപയോഗം ഉടനടി നിർത്തണമെന്നാണ് മന്ത്രാലയം നൽകിയിരിക്കുന്ന കർശന നിർദേശം.
ഫീഡിങ് ബോട്ടിലിന്റെ പുറംഭാഗത്തുള്ള പ്ലാസ്റ്റിക് പാളി അടർന്നുപോകാൻ സാധ്യതയുണ്ടെന്ന് കണ്ടെത്തിയതിനെ തുടർന്നാണ് ഈ നടപടി. ഇങ്ങനെ അടരുന്ന പ്ലാസ്റ്റിക് കഷണങ്ങൾ കുട്ടികളുടെ ഉള്ളിൽ ചെന്ന് ശ്വാസതടസ്സം ഉണ്ടാകാനുള്ള സാധ്യതയുണ്ടെന്ന് മന്ത്രാലയം ചൂണ്ടിക്കാട്ടി.
ഉപഭോക്താക്കൾ ഉൽപ്പന്നം ഉപയോഗിക്കുന്നത് ഉടൻ നിർത്തണമെന്നും റീട്ടെയിലറെ ബന്ധപ്പെട്ട് അത് തിരികെ നൽകണമെന്നും വാങ്ങിയ വിലയുടെ മുഴുവൻ റീഫണ്ട് നൽകണമെന്നും അധികൃതർ കൂട്ടിച്ചേർത്തു.
