റിയാദ്: രാജ്യത്തെ ഐസ്‌ക്രീം കടകൾക്കുള്ള നിയന്ത്രണങ്ങൾ പുതുക്കി സൗദി അറേബ്യ. മുനിസിപ്പാലിറ്റി മന്ത്രാലയമാണ് ഇതുസംബന്ധിച്ച നടപടികൾ സ്വീകരിച്ചത്. ഭക്ഷ്യസുരക്ഷ ഉറപ്പാക്കുന്നതിന് വേണ്ടിയാണ് നടപടി. ഉപഭോക്താക്കളുടെ സുരക്ഷയും സേവനങ്ങളുടെ ഗുണനിലവാരവും വർധിപ്പിക്കുക, ബിസിനസ്സ് ഉടമകൾക്കും നിക്ഷേപകർക്കും കൃത്യമായ മാനദണ്ഡങ്ങൾ നിശ്ചയിക്കുക എന്നിവയാണ് ഈ പരിഷ്‌കരണത്തിലൂടെ മന്ത്രാലയം ലക്ഷ്യമിടുന്നത്.
ഐസ്‌ക്രീം ഉൽപ്പന്നങ്ങൾ സ്വീകരിക്കുന്നത് മുതൽ സംഭരണം, നിർമാണം, വിതരണം വരെയുള്ള എല്ലാ ഘട്ടങ്ങളിലും കർശനമായ ഭക്ഷ്യസുരക്ഷാ മാനദണ്ഡങ്ങൾ പാലിക്കണമെന്നാണ് നിർദ്ദേശം. ഉത്പ്പന്നങ്ങൾ കേടുകൂടാതെ സൂക്ഷിക്കാൻ ആവശ്യമായ താപനില കൃത്യമായി നിലനിർത്തണം. ഐസ്‌ക്രീമിൽ അടങ്ങിയിരിക്കുന്ന ചേരുവകളും അലർജിക്ക് കാരണമായേക്കാവുന്ന ഘടകങ്ങളും ഉപഭോക്താക്കൾക്കായി കൃത്യമായി രേഖപ്പെടുത്തണം. കടകളിലും നിർമാണ പ്രക്രിയയിലും ഉയർന്ന രീതിയിലുള്ള വ്യക്തിശുചിത്വവും അണുനശീകരണ നടപടികളും ഉറപ്പാക്കണം. ജോലി ചെയ്യുന്ന ജീവനക്കാർക്ക് കൃത്യമായ ഹെൽത്ത് സർട്ടിഫിക്കറ്റ് ഉണ്ടായിരിക്കണം.
എല്ലാ സ്ഥാപനങ്ങളിലും ഇലക്ട്രോണിക് പേയ്മെന്റ് (ഡിജിറ്റൽ പണമിടപാട്) സംവിധാനങ്ങളും ഏകീകൃത ക്യുആർ കോഡുകളും നിർബന്ധമാക്കിയിട്ടുണ്ട്.
