റിയാദ്: സൗദിയിൽ സയാമീസ് ഇരട്ടകളെ വിജയകരമായി വേർപ്പെടുത്തി. ഫിജിയൻ സയാമീസ് ഇരട്ടകളെയാണ് വേർപ്പെടുത്തിയത്. സൗദി കോൺജോയിൻഡ് ട്വിൻസ് പ്രോഗ്രാമിലെ സ്‌പെഷ്യലൈസ്ഡ് മെഡിക്കൽ ആൻഡ് സർജിക്കൽ ടീമാണ് ജാസെപെലി, ഡെസീഷ്യ എന്നിവരെ വേർപ്പെടുത്തിയത്.
റിയാദിലെ നാഷണൽ ഗാർഡ് ഹെൽത്ത് അഫയേഴ്സ് മന്ത്രാലയത്തിന് കീഴിലുള്ള കിംഗ് അബ്ദുൽ അസീസ് മെഡിക്കൽ സിറ്റിയുടെ ഭാഗമായ കിംഗ് അബ്ദുല്ല സ്‌പെഷ്യലൈസ്ഡ് ചിൽഡ്രൻസ് ഹോസ്പിറ്റലിലാണ് ശസ്ത്രക്രിയ നടത്തിയത്. അനസ്‌തേഷ്യോളജി, പീഡിയാട്രിക് സർജറി, പ്ലാസ്റ്റിക് സർജറി, ഓർത്തോപീഡിക് സർജറി, യൂറോളജി, സപ്പോർട്ടിംഗ് സ്‌പെഷ്യാലിറ്റികൾ എന്നിവയിൽ നിന്നുള്ള 34 കൺസൾട്ടന്റുമാർ, സ്‌പെഷ്യലിസ്റ്റുകൾ, സാങ്കേതിക, നഴ്‌സിംഗ് സ്റ്റാഫ് എന്നിവരുടെ പങ്കാളിത്തത്തോടെയാണ് ശസ്ത്രക്രിയ നടത്തിയതെന്ന് കിംഗ് സൽമാൻ ഹ്യൂമാനിറ്റേറിയൻ എയ്ഡ് ആൻഡ് റിലീഫ് സെന്റർ സൂപ്പർവൈസർ ജനറലും മെഡിക്കൽ, സർജിക്കൽ സംഘത്തിന്റെ തലവനുമായ ഡോ. അബ്ദുള്ള അൽ റബീഅ പറഞ്ഞു.
ഇരട്ടകളുടെ വയറും പെൽവിസും പരസ്പരം ചേർന്ന നിലയിലായിരുന്നുവെന്നും കരൾ, കുടൽ, വൻകുടൽ, മലദ്വാരം, മൂത്രാശയം, പ്രത്യുത്പാദന വ്യവസ്ഥ, പെൽവിക് അസ്ഥി എന്നിവ പങ്കിട്ട അവസ്ഥയിലായിരുന്നുവെന്നും അദ്ദേഹം അറിയിച്ചു. സൗദിയിൽ സയാമിസ് ഇരട്ടകളെ വേർപ്പെടുത്താൻ നടത്തുന്ന 74-ാമത്തെ ശസ്ത്രക്രിയയാണിതെന്നും അദ്ദേഹം വ്യക്തമാക്കി. 12 മണിക്കൂറും 45 മിനിറ്റും നേരമെടുത്തെടുത്താണ് ശസ്ത്രക്രിയ പൂർത്തിയാക്കിയത്. 1990 മുതൽ ആരംഭിച്ച ഈ പദ്ധതിയിലൂടെ 28 രാജ്യങ്ങളിൽ നിന്നായി 158 ഇരട്ടക്കുട്ടികൾക്ക് സൗദി പുനർജന്മം നൽകിയിട്ടുണ്ട്. പദ്ധതിക്ക് രാജകുടുംബം നൽകുന്ന പിന്തുണയ്ക്ക് ഡോ. അബ്ദുല്ല അൽ റബീഅ നന്ദി അറിയിച്ചു.
